Сурия президенти Башар Асад ва унинг турмуш ўртоғи Асма Асад коронавирусдан соғайди. Бу ҳақда президент девонхонасининг Facebook’даги расмий аккаунтига таяниб «РБК» хабар берди.
«COVID-19 симптомлари йўқолди, улар топширган ПЦР-тестларнинг жавоби манфий чиқди», — дейилган президент девонхонаси хабарида.
30 март, сешанба кунидан бошлаб Асад ва унинг турмуш ўртоғи тўлиқ тартибда иш фаолиятига қайтади.
8 март куни Асад ва унинг хотини коронавирусга чалингани маълум бўлган эди. Шундан сўнг давлат раҳбари хотини билан биргаликда ўзини яккалаш тартибига ўтди ва масофавий ишлашда давом этди.
Маълумот учун, Сурияда коронавирусга чалиниш бўйича биринчи ҳолат 2020 йилнинг 23 март куни рўйхатга олинган. 2021 йилнинг февраль ойида ҳукумат Россиянинг коронавирусга қарши «Спутник V» вакцинасини маъқуллади.
Жаҳон соғлиқни сақлаш ташкилоти (ЖССТ) маълумотларига кўра, 2021 йилнинг 29 март ҳолатига кўра, Сурияда коронавирус билан касалланиш бўйича 18 498 та ҳолат аниқланди.
Пандемия даврида 1239 киши коронавирус қурбонига айланди. 29 март куни 142 кишида коронавирус аниқланди.
Аввалроқ Португалия президенти Марселу Ребелу ди Созанинг коронавирус инфекциясига топширган тести мусбат натижа кўрсатгани ҳақида хабар берилганди. Шунингдек, Арманистон президенти Армен Саркисян оиласи билан Янги йил таътилини ўтказиш пайтида Лондон шаҳрида коронавирус юқтириб олган. Президент матбуот хизмати унда касаллик оғир кечганини маълум қилган.
Бундан ташқари, Бразилия вице-президенти, Франция президенти Эммануэль Макрон, Швеция шаҳзодаси Карл Филипп ва малика Софияда ҳамда Украина президенти Владимир Зеленскийда коронавирус аниқланган.
Эслатиб ўтамиз, АҚШнинг собиқ президенти Дональд Трампда 1 октябрь куни коронавирус аниқланганди. АҚШ собиқ президенти бир неча кун касалхонада даволанган ва у ердан 5 октябрь куни чиққан. Ноябрь ойининг охирида эса Трампнинг ўғли кичик Дональд Трамп коронавирусга чалинган.
Изоҳ (0)