Sank-Peterburgning Krasnoselskiy tumanida o‘zbekistonlik mikroavtobus haydovchisiga qilingan hujumda gumon qilingan shaxs hibsga olindi. Bu haqda “Fontanka.ru” xabar qilmoqda.
Ma’lum qilinishicha, Sankt-Peterburgning Krasnoselskiy tumanida mikroavtobus haydovchisiga pichoq bilan jarohat yetkazgan shaxsni topish uchun bir kundan ko‘proq vaqt kerak bo‘ldi. Gumonlanuvchi hodisa joyidan bir kilometr narida ushlangan.
Qayd etilishicha, 30-mart kuni kechki soat oltilar arafasida tezkor xodimlar Novogorelovo qishlog‘idagi Sovremennikov ko‘chasi 3-uyda joylashgan kvartirada tergov o‘tkazishdi. Tergov yakunlangach, politsiya tanaga og‘ir shikast yetkazishda gumon qilingan 35 yoshli ijarachini olib ketdi.
Tergov ma’lumotlariga ko‘ra, ushlangan shaxs 28-mart, yakshanba kuni ertalab yo‘lovchi sifatida K-403 mikroavtobusida janjal chiqarib, haydovchiga pichoq bilan hujum qilgan. 34 yoshli O‘zbekiston fuqarosi qorin sohasi va yo‘g‘on ichakdagi jarohatlar bilan kasalxonaga yotqizilgan.
Qurol yoki shu kabi narsalar yordamida tanaga og‘ir shikast yetkazish moddasi bilan jinoiy ish qo‘zg‘atilgan. Gumonlanuvchi ikki kunga hibsga olingan va 30-martga o‘tar kechasi vaqtincha saqlash izolyatoriga joylashtirilgan.
Bundan avval Istanbulda o‘zbekistonlik deya gumon qilingan marhum yigitning shaxsiga aniqlik kiritilgani, Sankt-Peterburg metrosida mast holda politsiyachilarga hujum qilgan o‘zbekistonlik 10 oyga qamalgani hamda O‘zbekistonda qidiruvda bo‘lgan shaxs Rossiyada qo‘lga olingani haqida xabar berilgandi.
Izoh (0)