Shimoliy Koreya yetakchisi Kim Chen Inning singlisi, Mehnat partiyasi Markaziy qo‘mitasi axborot bo‘limi direktor o‘rinbosari Kim Yo Chjon Janubiy Koreya prezidenti Mun Chje Inni “Amerika to‘tisi” deb atadi. Bu haqda uning Koreya Markaziy telegraf agentligida e’lon qilingan bayonotiga tayanib, “Interfaks” xabar berdi.
Xabarga ko‘ra, Kim Yo Chjon Janubiy Koreya prezidentini KXDRning raketa sinovlaridan so‘ng muloqotni davom ettirishga chaqirgani uchun tanqid qilgan. Unga ko‘ra, Mun Chje In ballistik raketalarning uchirilishini qoralab, ikkala Koreya davlati va AQSh o‘zaro “muloqotni davom ettirishga urinishi lozimligi, uni murakkablashtiradigan harakatlar nomaqbulligini” ta’kidlagan.
“Uning uyatsizligidan taajjublanmaslikning iloji yo‘q. KXDRni o‘zini himoya qilish huquqidan mahrum qilish, uni BMTning rezolyutsiyalarini buzish va xalqaro hamjamiyatga tahdid qilishda ayblash kabi Janubiy Koreyaning bunday mantiqsiz va surbetlarcha xatti-harakatlari AQShning buzg‘unchilik mantig‘iga mos keladi”, — deyiladi Kim Yo Chjonning bayonotida.
Uning so‘zlariga ko‘ra, Mun Chje Inning aytgan gaplari bir-biriga zid keladi, chunki u 2020-yil iyul oyida qilgan nutqida Janubiy Koreyaning raketa sinovlarini “tinchlik va muloqot o‘rnatishga urinish” deb atagan edi.
“Mun Chje In Janubiy Koreyaning Mudofaa fanlari instituti tomonidan olib borilayotgan ballistik raketalar sinovini Koreya yarim orolidagi tinchlik va muloqotga qaratilganini ta’kidlagan. Endi bo‘lsa, Shimoliy Koreya Mudofaa fanlari akademiyasi tomonidan amalga oshirilgan raketa sinovlari nomaqbul ekan, bu janubdagilarga jiddiy tashvish tug‘dirib, muloqot atmosferasini sovitarmish”, — dedi siyosatchi va Janubiy Koreya prezidentini “Amerika tomonidan o‘rgatilgan to‘ti” deb atadi.
Eslatib o‘tamiz, 25-mart kuni Shimoliy Koreya ikkita taktik raketaning muvaffaqiyatli sinovlari haqida ma’lum qilgan. Koreyalik harbiylar xabariga ko‘ra, ikkala raketa ham KXDR sharqiy qirg‘oqlaridan 60 kilometr masofada joylashgan nishonga muvaffaqiyatli borib teggan.
KXDR Yapon dengiziga qarata ikkita ballistik raketani uchirdi. Raketa sinovlari haqida Yaponiya Mudofaa vazirligi va Janubiy Koreya harbiylari ma’lum qilgan. Bungacha esa AQSh harbiylari Pxenyan tez orada ballistik raketalar uchirishni qayta boshlashi haqida ogohlantirgan edi.
Keyinchalik Shimoliy Koreya raketalarni o‘zini himoya qilish maqsadida uchirganini aytdi. Koreya Mehnat partiyasi markaziy qo‘mitasi kotibi Li Ben Chxol Vashington va Seulning harakatlarini qoraladi. “Janubiy Koreya va AQSh tizimli ravishda xavfli harbiy mashg‘ulotlar olib borish va zamonaviy qurol turlarini joriy qilish bilan Koreya yarimoroliga muntazam harbiy tahdid solib kelmoqda”, — dedi u.
Izoh (0)