Koronavirus bilan kasallangan AQSh prezidenti Donald Tramp Merilend shtatidagi Uolter Rid milliy tibbiyot markazida bir necha kun davolanadi. Bu haqda AP’ga tayanib, Meduza xabar bermoqda.
Foto: BBC
Oq uy axborot xizmatining xabariga ko‘ra, Tramp prezidentlik vazifasini kasalxonada davom ettiradi. Prezident o‘z xizmat vazifalarini davom ettirishi uchun u yer barcha zarur narsalar bilan jihozlangan.
Tramp administratsiyasi 2-oktabr tushdan keyin AQSh prezidenti charchagan, ammo ko‘tarinki kayfiyatda ekanligini ma’lum qilgan.
Ma’lum qilinishicha, AQSh prezidenti yoshi (u 74 yoshda) va vazni (2019-yilda 110 kilogramm edi) tufayli xavf guruhiga kiradi.
Trampning davolovchi shifokorining aytishicha, COVID-19 tashxisi tasdiqlangandan so‘ng Amerika prezidenti Regeneron preparatining sakkiz grammli dozasini olgan. Bundan tashqari, Tramp sink, D vitamini, famotidin, melatonin va aspirin qabul qilgan.
Eslatib o‘tamiz, Donald Tramp va uning turmush o‘rtog‘i Melaniya Trampda 2-oktabr kuni koronavirus aniqlandi. Katta ehtimol bilan virus ularga Trampning maslahatchisi Houp Xiksdan yuqqan bo‘lishi mumkinligi ta’kidlangan.
Avvalroq Shavkat Mirziyoyev koronavirusga chalingan Donald Trampga maktub yo‘llab, uning tez fursatda sog‘ayishini tilagani xabar qilingandi.
