Armaniston prezidenti Armen Sarkisyan Londonda koronavirus bilan kasallangani haqida xabar berilgandi. Prezident matbuot xizmati unda kasallik og‘ir kechayotganini ma’lum qildi, deb yozmoqda “Interfaks”.
“Koronavirusga chalinish oqibatida izolyatsiya qilingan Armaniston prezidentida kasallik og‘ir kechmoqda. Prezident shifokorlar nazorati ostida davolanishni davom ettirmoqda”, — deyiladi matbuot xizmatining 8-yanvarda e’lon qilgan xabarida.
Matbuot xizmati xabariga ko‘ra, Sarkisyan o‘z imkoniyatlari doirasida masofadan turib ishlashni davom ettirmoqda. “Vaziyat barqarorlashgandan va shifokorlarning ruxsatidan so‘ng Armaniston prezidenti Yerevanga qaytadi”.
Eslatib o‘tamiz, prezident Armen Sarkisyan koronavirusga chalingani haqida 5-yanvar kuni ma’lum qilingandi.
Jons Hopkins universiteti ma’lumotiga ko‘ra, Armanistonda jami 161 415 kishida COVID-19 aniqlangan, kasallikdan 2 908 kishi vafot etgan.
