Kanada “Navalniy ishi” tufayli to‘qqiz nafar rossiyalik yuqori lavozimdagi amaldorga nisbatan sanksiyalar qo‘lladi
Kanada Tashqi ishlar vazirligi to‘qqiz nafar rossiyalik amaldor va kuchishlatar tizim vakillariga nisbatan mamlakatda inson huquqlari masalasidagi tizimli xatolar sabab sanksiya qo‘lladi.
Kanada TIV xabarida sanksiyalarning Aleksey Navalniyni zaharlashga va unga sud orqali ta’qib qilishga va Navalniyni qo‘llab-quvvatlash maqsadida namoyish o‘tkazganlarni hibsga olishga aloqador amaldorlarga nisbatan diplomatik xatti-harakat ekanligi qayd etilgan. Vazirlik ko‘rilgan choralarning AQSh hamda Yevropa Ittifoqining Navalniy ta’qibi tufayli joriy etgan sanksiyalariga mosligini bildirgan.
Kanada sanksiya ro‘yxatiga Federal xafsizlik byurosi direktori Aleksandr Bortnikov, Jazoni ijro etish federal xizmati direktori Aleksandr Kalashnikov, Rossiya prezidenti administratsiyasi rahbarining birinchi o‘rinbosari Sergey Kiriyenko, bosh prokuror Igor Krasnov, mudofaa vaziri o‘rinbosari Aleksey Krivoruchko, mudofaa vaziri o‘rinbosari Pavel Popov, Rossiya prezidenti administratsiyasi ichki siyosat bo‘yicha boshqarmasi rahbari Andrey Yarin, Rossiya gvardiyasi qo‘mondoni Viktor Zolotov, prezidentning Sibirdagi muovini Sergey Menyaylo kiritilgan.
“RIA Novosti”ning xabar qilishicha, Kreml Rossiyaning Kanada sanksiyalariga javob qaytarishini bildirgan.
Aleksey Navalniy “Novichok”dan zaharlanganidan keyin Germaniyada davolanib qaytgach, 2021-yil 17-yanvarda Jazoni ijro etish federal xizmati talabiga ko‘ra Sheremetyevo aeroportida hibsga olingan. 2-fevralda Moskvadagi Simonov sudi Navalniyaga nisbatan “Iv Roshe” ishi bo‘yicha shartli muddatni qamoq jazosiga almashtirgan. Navalniy ma’lum muddat tergov izolyatorida bo‘lgani va uy qamog‘ida ham saqlangani inobatga olingan holda unga ikki yarim yildan ko‘proq muddatga ozodlikdan mahrum qilish jazosi tayinlangan. U Vladimir viloyatidagi IK-2 qamoqxonasida jazo muddatini o‘tamoqda.
23-yanvarda Rossiyaning 100 dan ortiq shaharlarida Aleksey Navalniyni qo‘llab-quvvatlash maqsadida norozilik namoyishlari o‘tkazilgan. Keyinchalik 31-yanvar, 2 va 14-fevralda ham namoyishlar bo‘lib o‘tgan. “OVD-Info” bergan ma’lumotlarga ko‘ra, namoyishlar tufayli 11 mingga yaqin odam hibsga olingan.
