Qirg‘izistonda prezidentlikka sobiq nomzod Babanovga qarshi ochilgan jinoiy ishlar to‘xtatildi

Qirg‘izistonning sobiq bosh vaziri va prezidentlikka sobiq nomzod, tadbirkor Omurbek Babanovga qarshi sudga oshirilgan ishlar to‘xtatildi. Bu haqda mamlakat Milliy xavfsizlik davlat qo‘mitasiga tayanib, “Kommersant” xabar berdi. Shu bilan birga, Babanov “ixtiyoriy yordam sifatida” davlat budjetiga 100 million som (qariyb 1,2 million dollar) xayriya qiladi.

“Qirg‘iziston Respublikasi Parlamentining sobiq deputati va Qirg‘iziston Respublikasi prezidentligiga nomzod Omurbek Babanov va unga aloqador tijoriy tuzilmalariga nisbatan ilgari prokuratura va tergov bo‘linmalari tomonidan qo‘zg‘atilgan jinoyat ishlarining tergov natijalariga ko‘ra, Omurbek Babanov va uning qarindoshlari o‘z xatti-harakatlari bilan davlat, yuridik shaxslar va fuqarolarning manfaatlariga zarar yetkazishiga oid dalillar topilmagani tufayli jinoiy ishni yopish bo‘yicha qonun hujjatlariga asoslangan protsessual qarorlar qabul qilindi”, — deyiladi qo‘mita xabarida.

Babanovga qarshi jinoiy ishlarning ochilishi

“Respublika” partiyasi yetakchisi Omurbek Babanov 2017-yilda prezidentlikka nomzodini qo‘yishini e’lon qildi. U butun saylov kampaniyasi davomida mamlakatning o‘sha paytdagi rahbari Almazbek Atambayev qo‘llab-quvvatlagan So‘ronboy Jeenbekovning asosiy raqibi edi.

Jeenbekov sobiq bosh vazirni teledebatlardan birida qamoqqa olishga va’da bergan. Saylovoldi poygada Babanovga qarshi ikkita jinoiy ish ochilgan. Saylovlardan so‘ng Qirg‘iziston Bosh prokuraturasi uni konstitutsiyaviy tuzumni zo‘ravonlik bilan o‘zgartirishga chaqirganlik va ommaviy tartibsizliklarni uyushtirganlikda ayblab, unga qarshi jinoiy ish qo‘zg‘atgan.

Saylovda Jeenbekovga yutqazib qo‘ygan Babanov mamlakatdan chiqib ketdi va siyosatni butunlay tark etdi. Keyinchalik u qaytib kelib, Atambayev va Jeenbekov tomonidan oilasiga tahdid qilingani sababli mamlakatni tark etishga majbur bo‘lganini aytdi.

Qirg‘izistonning eng boy odamlardan biri Omurbek Babanov 2017-yildan Moskvada yashagan va 2019-yilda mamlakatga qaytib kelib, siyosatga qaytmaslikka va’da bergan. Babanovning so‘zlariga ko‘ra, ushbu va’dasi uchun hukumat unga qarshi ochilgan jinoiy ishni to‘xtatishga va’da bergan.

Babanov 2020-yilning oktabr oyida bosh vazir bo‘lish uchun siyosatga qaytishga urinib ko‘rdi, ammo 9-oktabr kuni Sadir Japarov tarafdorlari bilan o‘tgan to‘qnashuvdan so‘ng, o‘z nomzodidan voz kechdi. Babanov Japarovning bosh vazir lavozimiga nomzodini qo‘llab-quvvatlaganidan so‘ng, unga aloqador “Respublika” partiyasining a’zosi Ruslan Kazakbayev tashqi ishlar vazirligining rahbari bo‘ldi.

2021-yil 7-yanvarda Babanov Milliy xavfsizlik davlat qo‘mitasiga so‘roq qilish uchun chaqirilgani ma’lum bo‘ldi. So‘roqdan chiqqach, Babanov mazkur qo‘mitaga tashrifi prezident So‘ronboy Jeenbekov davrida qo‘zg‘atilgan jinoiy ishlar bilan bog‘liqligini aytdi.