23-yanvar kuni Rossiyaning o‘nlab shaharlarida Aleksey Navalniyni qo‘llab-quvvatlab mitinglar o‘tkazildi. U “Novichok” guruhidagi zahar bilan zaharlanganidan keyin Germaniyaga davolanishga ketgan, Rossiyaga qaytib kelganida esa darhol qo‘lga olinib, 30 kunlik qamoqqa mahkum qilingan edi. Siyosatchining shtabi aksiyalar arafasida ularning mamlakatdagi 93 ta shaharda bo‘lib o‘tishini e’lon qilgandi. Mitinglar chet elda — Avstraliya, Germaniya, Avstriya, Chexiya, Buyuk Britaniya, AQSh, Chernogoriya va boshqa mamlakatlarda ham bo‘lib o‘tdi.
Politsiya Yekaterinburgda miting ishtirokchisini qo‘lga olmoqda, 2021-yil 23-yanvar
Foto: AP Photo
Rossiya hukumati bilan muvofiqlashtirilmagan bo‘lsa-da, norozilik aksiyasi ko‘p yillar ichidagi eng yirigi bo‘ldi, deb yozadi Meduza. Unda o‘n minglab odamlar qatnashdi. Boshqa ko‘plab mitinglardan farqli o‘laroq, Rossiya hududlarida minglab odamlar ko‘chalarga chiqdi.
23-yanvar kungi aksiyalar chog‘ida butun Rossiya bo‘ylab 3352 kishi qo‘lga olingan. Bunday ma’lumotlarni 24-yanvar kuni ertalab “OVD-Info” keltirib o‘tdi.
Xususan, Moskvada 1331, Sankt-Peterburgda 501 kishi, shuningdek, Novosibirsk, Voronej, Qozon shaharlarining har birida 90 dan ziyod odam qo‘lga olingan. Ularning ko‘pchiligiga nisbatan aksiyalarda qatnashish qoidalarini buzganlik va shahar infratuzilmasiga xalaqit berganlik haqidagi ma’muriy moddalar ilgari surilmoqda.
Qayd etilishicha, qo‘lga olinganlarning umumiy soni Rossiya zamonaviy tarixidagi norozilik namoyishlari tarixida rekord hisoblanadi. Bungacha rekord sonli odamlar mamlakatda 2017-yil 12-iyunda qo‘lga olingan edi — 1769 kishi.
Moskvada esa rekord sonli qo‘lga olishlar 2019-yil 27-iyul kuni Moskva shahar dumasiga saylovlarga mustaqil nomzodlarning kiritilishini yoqlab o‘tkazilgan aksiyada bo‘lgan, o‘shanda 1372 kishi qo‘lga olingan edi.
Mitinglar chog‘ida ko‘plab jurnalistlar jabrlandi. Jurnalistlar mustaqil kasaba uyushmasi jurnalistlarning kasbiy faoliyatiga to‘sqinlik qilish bilan bog‘liq 52 ta holatni qayd etdi.
Mitinglar yakunlariga ko‘ra allaqachon jinoiy ishlar qo‘zg‘atildi. Ular o‘ndan ortiq bo‘lib, huquq-tartibot organlari xodimlariga nisbatan zo‘ravonlik, ommaviy tartibsizliklarga da’vatlar, mol-mulkka qasddan zarar yetkazish va bezorilik haqidadir.
Navalniyning tarafdorlari bir haftadan keyin yana aksiyalar o‘tkazish niyatini bildirdi.
AQSh Davlat departamenti Rossiyaning siyosatchi Aleksey Navalniyni qo‘llab-quvvatlab o‘tkazilgan aksiyalarni bostirish chog‘idagi xatti-harakatlarini qoraladi. Buyuk Britaniya tashqi ishlar vaziri Dominik Raab ham shunga o‘xshash bayonot bilan chiqish qildi. Ikkala tomon ham Rossiyani xalqaro kelishuvlarga rioya qilishga va noroziliklar paytida qo‘lga olinganlarni ozod etishga chaqirdi.
