Канада «Навальний иши» туфайли тўққиз нафар россиялик юқори лавозимдаги амалдорга нисбатан санкциялар қўллади
Канада Ташқи ишлар вазирлиги тўққиз нафар россиялик амалдор ва кучишлатар тизим вакилларига нисбатан мамлакатда инсон ҳуқуқлари масаласидаги тизимли хатолар сабаб санкция қўллади.
Канада ТИВ хабарида санкцияларнинг Алексей Навальнийни заҳарлашга ва унга суд орқали таъқиб қилишга ва Навальнийни қўллаб-қувватлаш мақсадида намойиш ўтказганларни ҳибсга олишга алоқадор амалдорларга нисбатан дипломатик хатти-ҳаракат эканлиги қайд этилган. Вазирлик кўрилган чораларнинг АҚШ ҳамда Европа Иттифоқининг Навальний таъқиби туфайли жорий этган санкцияларига мослигини билдирган.
Канада санкция рўйхатига Федерал хафсизлик бюроси директори Александр Бортников, Жазони ижро этиш федерал хизмати директори Александр Калашников, Россия президенти администрацияси раҳбарининг биринчи ўринбосари Сергей Кириенко, бош прокурор Игорь Краснов, мудофаа вазири ўринбосари Алексей Криворучко, мудофаа вазири ўринбосари Павел Попов, Россия президенти администрацияси ички сиёсат бўйича бошқармаси раҳбари Андрей Ярин, Россия гвардияси қўмондони Виктор Золотов, президентнинг Сибирдаги муовини Сергей Меняйло киритилган.
«РИА Новости»нинг хабар қилишича, Кремль Россиянинг Канада санкцияларига жавоб қайтаришини билдирган.
Алексей Навальний «Новичок»дан заҳарланганидан кейин Германияда даволаниб қайтгач, 2021 йил 17 январда Жазони ижро этиш федерал хизмати талабига кўра Шереметьево аэропортида ҳибсга олинган. 2 февралда Москвадаги Симонов суди Навальнийага нисбатан «Ив Роше» иши бўйича шартли муддатни қамоқ жазосига алмаштирган. Навальний маълум муддат тергов изоляторида бўлгани ва уй қамоғида ҳам сақлангани инобатга олинган ҳолда унга икки ярим йилдан кўпроқ муддатга озодликдан маҳрум қилиш жазоси тайинланган. У Владимир вилоятидаги ИК-2 қамоқхонасида жазо муддатини ўтамоқда.
23 январда Россиянинг 100 дан ортиқ шаҳарларида Алексей Навальнийни қўллаб-қувватлаш мақсадида норозилик намойишлари ўтказилган. Кейинчалик 31 январь, 2 ва 14 февралда ҳам намойишлар бўлиб ўтган. «ОВД-Инфо» берган маълумотларга кўра, намойишлар туфайли 11 мингга яқин одам ҳибсга олинган.
