Hindistonda koronavirusning ikki marta mutatsiyaga uchragan yangi shtammi aniqlandi. Bu haqda Hindiston Sog‘liqni saqlash vazirligiga tayanib “Interfaks” xabar berdi.
“Maxarashtra (Hindistonning g‘arbiy hududi)dagi namunalarni tahlil qilish mobaynida, mazkur namunalardagi E484Q va L452R mutatsiyalarining ulushi 2020-yil dekabr holatiga nisbatan ortgani kuzatildi. Ushbu mutatsiyalar namunalarning, taxminan, 15—20 foizida aniqlangan va ilgari aniqlangan xavotirli shtammlarning hech biriga mos kelmaydi”, — deyiladi Hindiston Sog‘liqni saqlash vazirligi Twitter’ida.
10 mingdan ortiq namunalar tahlil qilinar ekan, vazirlik “britancha” shtammga chalinish bo‘yicha 736 ta, “afrikacha” shtamm bo‘yicha 34 ta, “braziliyacha” shtammni yuqtirish bo‘yicha bitta holatni aniqlagan. Ushbu shtammlarning namunalari Hindistonning 18 shtatida topilgan.
The Indian Express nashrining yozishicha, Hindistonning ko‘plab hududlarida COVID-19 yuqtirish holatlari ortgan. Shu sababli, hukumat 1-apreldan 45 yoshdan katta bo‘lgan barcha aholini emlashga ruxsat berishga qaror qildi. Dehli va Mumbayda esa hafta oxirida boshlanadigan Xoli bayramini nishonlash taqiqlanadi.
2021-yilning 24-mart kuni Hindiston hukumatining koronavirus pandemiyasi tufayli lokdaun e’lon qilganiga bir yil to‘ldi. Jons Hopkins universiteti ma’lumotlariga ko‘ra, pandemiya boshidan beri mamlakatda 11, 7 million kishida koronavirus aniqlangan, 160 ming kishi infeksiya oqibatida vafot etgan.
Avvalroq Finlyandiyada koronavirusning yangi mutatsiyasi aniqlandi. Janubiy Finlyandiyada aniqlangan koronavirus namunasida SARS-CoV-2 virusining ilgari noma’lum variantiga duch kelingan.
Shuningdek, Norvegiyada koronavirusning В.1.525 nomli shtammi aniqlandi. Bu odatiy COVID-19’dan ancha xavfliroq bo‘lishi mumkin.
Bundan tashqari, Britaniyada koronavirusning “xavotirliroq” turi va Kaliforniyada koronavirusning butunlay yangi shtammi qayd etildi.
Izoh (0)