O‘zbekistonda 10-iyun soat 23:00 dan 11-iyun 23:00 gacha koronavirusga chalinish bilan bog‘liq 118 ta holat qayd etildi.
Yangi kasallanish holatlari
Qayd etilgan yangi kasallanish holatlarining- 70 tasi karantin muassasalarida;
- 39 tasi aholi orasida (shundan 18 tasi Navoiy viloyatida, Toshkent shahrida 17 ta, Namangan viloyatida 3 ta hamda Toshkent viloyatida 1 ta);
- 9 tasi xalqaro yuk tashuvchi avtomashina haydovchilari orasida (Toshkent viloyatida 4 ta, Sirdaryoda 3 ta, Qoraqalpog‘istonda 2 ta) aniqlangan.
Aholi orasida koronavirus infeksiyasi qayd etilishi hali hamon yuqori bo‘lib turibdi. 11-iyunda bu borada oxirgi uch kundagi eng yuqori ko‘rsatkich qayd etildi. Aholi orasida 9-iyun kuni 25, 10-iyun kuni 27 kishida koronavirus aniqlangandi.
Navoiy viloyatida bir kun avval birorta ham yangi kasallanish holati qayd etilmagandi, 11-iyunda esa bir yo‘la aholi orasida 18 ta kasallikka chalinish holati qayd etildi. Ushbu viloyatda ikki kun avval ham aholi orasida kasallik yuqtirib olish bilan bog‘liq 13 ta holat aniqlangandi.
Toshkent shahri esa 10-iyunni hisobga olmasa, aholi orasida yangi kasallanganlar soni so‘nggi kunlarda 10 nafardan oshiq bo‘lmoqda (10-iyunda 7 ta, 9-iyunda 11 ta, 8-iyunda 54 ta, 7-iyunda 195 ta). 11-iyun kuni ham 17 kishida koronavirus aniqlandi. Ulardan 2 nafari Yunusobod bozoridagi sotuvchilardir.
Qoraqalpog‘istonda 4-iyundan buyon koronavirusga chalinish bilan bog‘liq yangi holat qayd etilmayotgandi. 11-iyun kuni ikki nafar xalqaro yuk mashinasi haydovchisida koronavirus aniqlandi. Qoraqalpog‘istonda 4-iyun va 29-may kuni qayd etilgan holatlar ham xalqaro yuk mashinasi haydovchilarida aniqlangandi.
Koronavirusdan davolanish
11-iyun davomida 105 nafar fuqaro koronavirus infeksiyasidan sog‘aydi. Ulardan 78 nafari Toshkent shahridagi, 17 nafari Navoiy viloyatidagi, 9 nafari Samarqand viloyatidagi, 1 nafari Qoraqalpog‘istondagi tibbiyot muassasalarida davolanib chiqdi.Ma’lumot o‘rnida, Jizzax, Surxondaryo va Farg‘ona viloyatlari koronavirusdan xoli hudud bo‘lib turibdi. Andijon (4 nafar bemor) va Qoraqalpog‘iston (4 nafar bemor) ham koronavirusdan xoli hududga aylanishga yaqin turibdi. Buxoroda 11, Xorazmda 14, Namanganda 15 nafar bemor qoldi.
Hozirda kasallik qayd etilgan jami 4741 nafar bemordan 3637 nafari sog‘ayib, davolanish ko‘rsatkichi 76 foizni tashkil etmoqda. Bu boradagi ko‘rsatkich 8-iyundan beri o‘zgarishsiz qolmoqda. Hududlar bo‘yicha eng yomon ko‘rsatkich Qashqadaryoga tegishli bo‘lib turibdi — 15 foiz. 5-iyungacha “yashil” hudud bo‘lgan Qashqadaryoda 40 nafar bemordan 6 nafari davolangan.
Sirdaryo va Toshkent viloyatlaridagi bemorlar Toshkent shahrida davolanmoqda. Eng ko‘p bemor hozir aynan Toshkent shahrida (865 kishi) bo‘lib, davolanish ko‘rsatkichi 66 foizni tashkil etmoqda. Toshkent shahrida bu boradagi ko‘rsatkich bir kun avval 64 foiz edi. Ayni damda O‘zbekistonning to‘qqiz hududidagi tibbiyot muassasalarida davolanayotgan bemorlar soni 1085 nafarga teng.
Ahvoli og‘ir bemorlar
Ayni paytda tibbiyot muassasalarida davolanayotgan 1085 nafar bemordan 10 nafari og‘ir, 2 nafari esa o‘ta og‘ir ahvolda. SSVning 11-iyun soat 10:00 holatiga ko‘ra bergan axboroti bilan taqqoslansa, ahvoli o‘ta og‘ir bemorlar bir nafarga ko‘paygan. Bir kun avval ahvoli og‘ir bemorlar 8, ahvoli o‘ta og‘ir bemor 1 nafarni tashkil etayotgandi.15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan.
Karantindagilar
Shu kungacha jami 458 539 nafar fuqaro karantinga olingan bo‘lib, ularning 411 033 nafari karantindan chiqarilgan. Bir kun ichida karantinga olinganlar soni 4420 nafarga, karantindan chiqarilganlar 3683 nafarga ko‘paydi.Hozirda O‘zbekistonda uy karantinida 23 923 nafar, statsionar karantinda esa 23 583 nafar fuqaro tibbiy kuzatuvda bo‘lib turibdi.
Izoh (0)