Narpay tuman XTB mas’uli jinoyati uchun lavozimida ishlash huquqidan mahrum bo‘lgandi. Biroq u faoliyatini davom ettirmoqda

Samarqand viloyatining Narpay tumani xalq ta’limi bo‘limida kadrlar bo‘yicha inspektor lavozimida ishlab kelayotgan G‘ulom Ismoilov 15 nafar o‘qituvchi malaka attestatsiyasidan o‘tmagan bo‘lsa-da, ularning attestatsiyadan o‘tganligini tasdiqlovchi soxta hujjat tayyorlagan. Hamda 2018/2019-o‘quv yilida 23 million 519 ming so‘m ish haqi noqonuniy to‘lanib, budjet mablag‘lari talon-toroj qilinishiga sababchi bo‘lgan. Bu haqda “Daryo” muxbiri Farhod Norbo‘tayev xabar berdi.

Ma’lum bo‘lishicha, XTBning kadrlar bo‘yicha inspektori G‘ulom Ismoilov 2018-yil iyun oyida mutasaddi tashkilotlarga 15 nafar o‘qituvchi attestatsiyadan o‘tmagan bo‘lsa-da, “ular attestatsiyadan o‘tdi” degan yolg‘on ma’lumot bergan. Hamda qat’iy hisobda turuvchi rasmiy hujjat hisoblangan pedagog kadrlarning attestatsiyadan o‘tganligi to‘g‘risidagi sertifikatlarni soxtalashtirgan.

2020-yil 10-fevral kuni Jinoyat ishlari bo‘yicha Narpay tuman sudida so‘z olgan G‘ulom Ismoilov o‘z aybiga to‘liq iqrorligini bildirib, jinoiy maqsadiga erishish yo‘lida kadrlar bo‘limiga tegishli muhr bilan soxta jadvallar tuzganligini, so‘ngra ularni maktab direktorlariga taqdim qilganligini aytgan.

XTB mas’ulining qilmishi sabab attestatsiyadan o‘tmagan o‘qituvchilarning toifa sertifikatlar olganligi haqida tarifikatsiya tuzilgan va o‘qituvchilarning ish haqlariga noqonuniy malaka ustamalari qo‘shib berilgan.

G‘ulom Ismoilov ishini ko‘rib chiqqan sud uni Jinoyat kodeksining 167-moddasi 2-qismi “g” bandi (Mansab mavqeyini suiiste’mol qilish yo‘li bilan o‘zlashtirish yoki rastrata yo‘li bilan talon-toroj qilish), 228-moddasi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan aybli deb topib, 1 yil 6 olti oy muddatga mansabdor va moddiy javobgar shaxs lavozimlarida ishlash huquqidan mahrum qilgan. Shuningdek, har oyda ish haqi daromadining 20 foiz miqdorida davlat foydasiga undirish sharti bilan 1 yil 6 olti oy muddatga axloq tuzatish ishlariga jalb qilingan.

“Daryo” muxbirining aniqlashtirishicha, sud hukmi bilan 2020-yil 10-fevraldan boshlab 1 yil 6 olti oy muddatga mansabdor va moddiy javobgar shaxs lavozimlarida ishlash huquqidan mahrum qilingan G‘ulom Ismoilov ayni paytda tuman XTBda o‘z faoliyatini davom ettirmoqda.

Eslatib o‘tamiz, avvalroq tumandagi maktab o‘qituvchilari ro‘za paytida maktab hojatxonalarini tozalashga jalb qilingani haqida xabar berilgandi. Keyinchalik hokim nomidan topshiriq berib, o‘qituvchilarni hojatxona tozalashga majbur qilgan shaxs XTB mudiri Mirzohid Yo‘ldoshev ekanligi ma’lum bo‘ldi.

“Daryo”ga taqdim etilgan audioda mudir direktorlardan “Saxovat va ko‘mak” harakati uchun 100 ming so‘mdan pul o‘tkazishni so‘ralganligi ham oydinlashgandi. Shundan so‘ng, o‘qituvchilarni hojatxona ta’mirlashga majbur qilgan XTB mudiri ishdan olindi.