Ko‘z salomatligi hazilmas va shifokorsiz bu ishni uddalab bo‘lmaydi. Ammo ko‘zoynak, apparatli muolajalar yoki jarrohlik amaliyotlaridan tashqari, o‘zingiz mustaqil bajara oladigan foydali ishlar ham bor. Quyida keltirilgan usullar birgalikda qo‘llanganda yanada yaxshi natija beradi.
Faqatgina mashqlar va parhez bilan ko‘zni to‘liq tiklab bo‘lmaydi, lekin muntazam parvarish ko‘zlaringizga dam berishga, ko‘z mushaklarini chiniqtirishga va kerakli moddalar bilan ta’minlashga yordam beradi. Bu esa ko‘rish qobiliyatining yomonlashuvi va yoshi o‘tgan sayin paydo bo‘ladigan kasalliklarning oldini oladi.
Ko‘rishni yaxshilash yo‘llari:
1. Oziqlanishni to‘g‘irlang
Ha, ko‘z haqida gap ketganda ham, avvalambor ovqatlanish muhim. Chunki tanangizdagi barcha a’zolarga, jumladan ko‘zlarga ham yegan ovqatingiz ta’sir qiladi.
Ratsionga ko‘p to‘yinmagan yog‘lar va yog‘ kislotalarini (masalan, baliqda ko‘p) qo‘shing. A, B, C, D vitaminlari, selen, beta-karotin kabi moddalar ko‘z uchun juda foydali.
Ko‘proq sut mahsulotlari, mol go‘shti, tuxum, sabzavot (ayniqsa sabzi, qovoq va boshqa to‘q sariq sabzavotlar), ko‘katlar, meva va rezavorlar iste’mol qiling.
2. Qonda shakar miqdorini nazorat qiling
Shakar va to‘yingan yog‘larni ortiqcha iste’mol qilish, shuningdek, yuqori qon bosimi to‘r parda qon tomirlariga zarar yetkazadi va katarakta, diabetik retinopatiya va glaukoma kabi kasalliklarning xavfini oshiradi.
3. Har kuni 8 soat uxlashga harakat qiling
Doimiy uyqusizlik bosh ichidagi bosimni oshiradi, bu esa ko‘z to‘qimalarining qon bilan ta’minlanishini yomonlashtiradi. Ko‘z nervlari shikastlanishi, shishlar paydo bo‘lishi mumkin. Tanani tiklash va ko‘zlarga kerakli moddalar yetib borishi uchun sifatli uyqu zarur.
4. Ko‘proq sayr qiling va jismoniy faollikni oshiring
Ba’zi sport turlari (keskin harakatlar talab qiladigan) ko‘rish bilan bog‘liq muammosi borlarga tavsiya etilmaydi. Ammo to‘g‘ri yondashuv bilan sport ko‘zlar uchun do‘stga aylanadi.
Eng foydali sportlar — suzish va badminton. Ular ko‘z mushaklarini mashq qildiradi. Stol tennisi, voleybol, basketbol ham ko‘rish qobiliyatini rivojlantirishda yordam beradi.
Shifokor maslahatidan so‘ng sport bilan shug‘ullanishni boshlang.
5. Ko‘z mashqlarini bajaring
Agar ko‘rish muammosi asosan diqqatni jamlash qobiliyatining susayishi bilan bog‘liq bo‘lsa (masalan, uzoq vaqt telefon yoki kompyuterga tikilib o‘tirish), unda mashqlar va ko‘z uchun maxsus tomchilar “sun’iy yosh” yordam beradi.
Mashqlar:
1. 3 soniya ko‘zlaringizni mahkam yumib, so‘ng 3 soniya keng oching. 8 marta takrorlang.
2. To‘g‘riga qarab 3 soniya qarang, so‘ng 30 sm uzoqlikda tutgan barmog‘ingiz uchiga 5 soniya tikiling. 10 marta takrorlang.
3. Barmog‘ingiz uchiga qarab, asta-sekin ko‘z oldingizga yaqinlashtiring. Ko‘zingiz ikkilanayotganini sezgancha qarang, so‘ng avvalgi holatga qaytaring. 8 marta takrorlang.
4. 1–2 daqiqa tez-tez qovog‘ingizni pirpirating.
5. Ko‘zingizni yuming va barmoqlaringiz bilan ko‘z qovoqlaringizni yumshoq aylana harakatlar bilan massaj qiling (60 soniya).
6. Ko‘zingiz bilan yuqoriga, pastga, chapga, o‘ngga qarang, geometrik shakllar chizing.
7. Burun uchiga qarang, 5 gacha sanang, ko‘zingizni dam oldiring. Shiftga qarang, peshonangiz markaziga diqqat qiling. Takrorlang.
8. Deraza oynasiga 3–5 mm qora yoki qizil doira yopishtiring. Unga qarab turing, so‘ng deraza ortidagi biror obyektga qarang. Dastlab 5 daqiqa, keyin 7 daqiqa mashq qiling. Bir ko‘z bilan va ikki ko‘z bilan bajaring.
Norbekov, Danov, Avetisov, Beyts’larning ko‘z salomatligiga oid mashq metodikalarini o‘rganing. Ularning maqsadi — ko‘z mushaklarini mustahkamlash, charchoqni kamaytirish va ko‘z ichki suyuqliklarining aylanishini yaxshilash. Muntazam mashqlar orqali siz ko‘rishni uy sharoitida sezilarli darajada yaxshilashingiz mumkin.
Izoh (0)