Xorazmda soliq inspektoriga, Qashqadaryoda esa sud-ekspertiza markazi xodimiga nisbatan jinoyat ishi qo‘zg‘atildi.
Maʼlum qilinishicha, Yangiariq tumani davlat soliq inspeksiyasining mahallalarga biriktirilgan soliq inspektorlari sho‘basi davlat soliq inspektori trikotaj mahsulotlari ishlab chiqarish va ulgurji savdosi bilan shug‘ullanuvchi MCHJning soliq qarzdorligini undirmasdan, uni bankrotlik asosida tugatib berishni vaʼda qilgan.
Buning evaziga o‘zining yaqin aloqasi orqali 900 dollar olgan vaqtida ushlandi.
Hozirda soliq inspektoriga nisbatan Jinoyat kodeksining 168-moddasi 3-qismi “v” bandi (firibgarlik xizmat mavqeyidan foydalangan holda) bilan jinoyat ishi qo‘zg‘atilib, tergov harakatlari olib borilmoqda.
Shuningdek, Yakkabog‘ tumanida yashovchi, 1985-y.t., muqaddam sudlangan shaxs chorvachilikka ixtisoslashgan fermer xo‘jalik tomonidan suv taʼminotiga noqonuniy ulanib, foydalanganligi holati bo‘yicha aniqlangan 99 mln so‘mlik zararni tegishli tashkilot ekspertlari orqali yo‘q qilib berishni vaʼda qilgan. Buning evaziga, fermer xo‘jalikning ish boshqaruvchisidan 1500 dollar olgan vaqtida ushlandi.
Tezkor tadbir davom ettirilib, X.Sulaymonova nomidagi Respublika sud-ekspertiza markazining Qashqadaryo viloyat bo‘linmasi eksperti ushbu 1500 dollarni olgan vaqtida ushlandi.
Hozirda fuqaro va ekspertga nisbatan Jinoyat kodeksining 168-moddasi 3-qismi “v” bandi (firibgarlik xizmat mavqeyidan foydalangan holda) va 28,211-moddasi 1-qismi (pora berish) bilan jinoyat ishi qo‘zg‘atilib, tergov harakatlari olib borilmoqda.
Izoh (0)