“Daryo”da Oliy sud raisining sobiq o‘rinbosari Bahodir Dehqonovning ko‘rsatmasi bilan qamalgan samarqandlik tadbirkor Prezidentdan najot kutayotganligi to‘g‘risida maqola e’lon qilingandi.
2017-yil fevral oyida Jinoyat kodeksining 165-moddasi 2-qismi “a, v”, 168-moddasi 3-qismi “a” bandi, 184-moddasi 3-qismi, 189-moddasi, 28, 211-moddasi 3-qismi “a” bandi va 243-moddasida nazarda tutilgan jinoyatlarni sodir etganlikda aybli deb topilgan Sherzod Burhonovga 12 yil 6 oy muddatga ozodlikdan mahrum qilish jazosi tayinlangan.
Mazkur masala yuzasidan jurnalistik surishtiruv olib borayotgan “Daryo” muxbiri Farhod Norbo‘tayev samarqandlik tadbirkor, mahkum Sherzod Burhonov bilan suhbat uyushtirdi.
— Bilasizmi, sud qanday o‘tdi, xuddi teatrdek. Bo‘ynimga nohaq ayblovlarni qo‘yishdi. Sudya “sen qamalasan, mol-mulking musodara bo‘ladi” dedi. Birovlarning mol-mulki musodara bo‘ldi. Men hatto sudyaga birovlarning mol-mulki, ya’ni 6 ta avtomobil, “Almaz zolotoy dvorets” restoranini qaytarib bering, menga tegishli bo‘lgan “Almaz Mastura Almos” baxmal ishlab chiqarish sexini musodara qiling deb aytdim. Ammo sudya buni rad etdi, — deydi Sherzod Burhonov. – Keyinchalik buyurtmachilarning maqsadi “Almaz zolotoy” restoraniga qaratilganligini bildim. Ularning niyati restoranga egalik qilish edi. Bular hatto keyinchalik restoran sotuvga qo‘yilganidan keyin ham sotib olaman deb yugurishdi. Lekin orada boshqalar sotib olib ketdi.
Sherzod Burhonov qamalganidan so‘ng 350 kishi ishlab kelgan “Almaz Mastura Almos” baxmal sexining faoliyati ham to‘xtagan. Natijada korxonada faoliyat yurituvchi ishchilar tirikchilik uchun chet elga ishlagani ketib qolgan.
— Meni 12,5 yilga qamash dastlabki reja bo‘lgan. Ularning asl maqsadi keyinchalik meni qamoqxonada uzoq muddatga qoldirish edi, — deydi Sherzod Burhonov. — Prezidentimizning besh kishiga ish bergan tadbirkor mening himoyamda degan gaplarini eshitib juda xursand bo‘lganman. Nasib qilsa chiqib olsam, albatta, korxonalarni ishlatib, restoranlarimni qaytarib olib, kelgusida astoydil mehnat qilaman.
2012-yilning 20-iyul kuni Samarqand shahridagi 11-son davlat notarial idorasining notariusi Mubin Jo‘rayev tomonidan tasdiqlangan 82/100 qism uy-joy oldi-sotdi shartnomasida “Almaz zolotoy dvorets” restorani qurilgan joy — Abdurahmon Jomiy ko‘chasi, 29-uy Burhon Sirojevdan sotib olinganligi ko‘rsatilgan. Hatto shartnomaning 3-bandida kadastr xizmat ma’lumotnomasiga muvofiq, sotilayotgan 82/100 qism uy-joyning inventarizatsion narxi 34, 551 820 so‘mni tashkil qilib, taraflar tomonidan 100 million so‘mga baholangani va sotuvchi ushbu pulni sotib oluvchidan shartnomani imzolash arafasida to‘liq olganligi bildirilgan.
Ammo Baxtiyor Sirojev otasining nomiga rasmiylashtirilgan Abdurahmon Jomiy ko‘chasi, 29-uyning pulini olinmagan deb murojaat qilgan. Shuningdek, uning yonida 11 nafar fuqaro yashaydigan 27-“A” uy ham sotib olingan. Biroq ularning birortasi pulni olganim yo‘q deb murojaat qilmagan. Birgina Baxtiyor Sirojevning asossiz murojaati sabab 27-“A” uy ham musodara bo‘lib ketgan. Jinoyat ishlari bo‘yicha Samarqand shahar sud sudyasi Bahodir Aliqulov esa ushbu notarial qog‘ozlarni inobatga olmagan.
—Dushmanlarim yaqinlarim bo‘lib chiqishdi. Natijada birovlarning mol-mulklari musodara qilindi. Ular haligacha o‘zining mulkini so‘rab kelishadi, — deydi Sherzod Burhonov. — Birovlarga o‘xshab mablag‘larni chet elga chiqarganim yo‘q. Hatto kredit ham olmaganman. Soliqlarni o‘z vaqtida to‘lab kelganman. Ammo baribir bo‘ynimga 1 milliard 600 million so‘m qarz qo‘yildi. Uning o‘rniga 6 ta avtomashina va 4,5 milliard so‘mga baholangan “Almaz zolotoy dvorets” restorani musodara bo‘lib ketdi.
Sherzod Burhonovning ta’kidlashicha, sud jarayonida auditorning tekshiruv xulosalari xronometraj qilinib, sudya Bahodir Aliqulovga tushuntirilganiga qaramasdan sud buni inobatga olmagan. Sud jarayonida korxonada taftish o‘tkazgan Samarqand viloyat Davlat soliq boshqarmasi xodimi auditorning savollariga javob berolmagan.
— Menga qo‘yilgan 243-moddani qamoqqa kirganimdan so‘ng bildim. Bu “Jinoiy faoliyatdan olingan daromadlarni legallashtirish” moddasi ekan. Uni kimga qo‘yadi? Bu modda noqonuniy pul ishlagan bo‘lsa qo‘yiladi. 184-modda (“Soliqlar yoki boshqa majburiy to‘lovlarni to‘lashdan bo‘yin tovlash”) va 189-modda (“Savdo yoki xizmat ko‘rsatish qoidalarini buzish”) ham asossiz qo‘yilgan. Axir men mansabdor shaxs emasman-ku? Men zavod va fabrika ishlataman, — deydi Sherzod Burhonov. — Ular o‘sha payt baxmal sexini olishi kerak edi. Ammo u bularga ma’qul bo‘lmagan. Ular kattaroq narsani mo‘ljallagan. Qolaversa, birinchi marta ko‘ryapman, ishlaganiga 2 oy bo‘lgan korxonaga 138 million so‘m qarz qo‘yilganini. Ular shunaqa tuhmatlar bilan qamab qo‘yishdi.Sherzod Burhonov Prezident Shavkat Mirziyoyevdan o‘ziga qo‘yilgan ayblovlarni qaytadan ko‘rib chiqishda yordam so‘ramoqda. Uning aybsizligi, sobiq sudya Bahodir Dehqonov va MXXning sobiq birinchi o‘rinbosari Shuhrat G‘ulomov, ularning topshirig‘ini bajargan sudya Bahodir Aliqulov hamda tergovni buyurtma asosida olib borgan katta leytinant San’at Odilovning noqonuniy xatti-harakatlari ko‘rib chiqilishini istamoqda.
— Maqsadim bitta, xalqimizda tadbirkor ko‘paysin. Odamlarimiz shu yerda ishlasin, chetga chiqmasin. O‘zbekistonni dunyoga tanitib, chet elga mahsulotlarini eksport qilsin, — deydi Sherzod Burhonov.
Sherzod Burhonov Oliy sud tomonidan “Daryo” nashri orqali berilgan munosabatga ham o‘z qarashini bildirib o‘tdi.
– Men Oliy sudning munosabatini o‘qidim. U yerda oliy ma’lumotli, Prezident ishonch bildirgan shaxslar ishlaydi. Ammo to‘g‘risi, juda kulgili javob bo‘lgan. Maqolada aniq savol qo‘yilgan. Nima uchun birovning mulki bo‘lgan “Almaz zolotoy dvorets” restorani, 6 ta avtomashina noqonuniy tarzda musodara bo‘ldi? Qolaversa, nega 12,5 yil muddatga qamalishi so‘ralgan? — deydi Sherzod Burhonov. — Ammo ularning javobida “advokat Ozoda Muxtorovaning murojaati yuzasidan bizlar bir yil muddatini kamaytirdik” deyilgan. Jinoyat Kodeksining 168-moddasida (“Firibgarlik”) agar yetkazilgan moddiy zararning o‘rni qoplangan taqdirda ozodlikni cheklash va ozodlikdan mahrum qilish tariqasidagi jazo qo‘llanilmaydi deb belgilab qo‘yilgan. Menga bu modda bilan 2 yil hukm o‘qilib, keyinchalik bir yilini olib tashlayapti. Biz haqiqat uchun murojaat qilyapmiz, bir yil muddatni olish uchun emas.
Sherzod Burhonov binolar va mol-mulklar musodara qilinishidan tushgan pullar qayerga ketgan degan savolni ham o‘rtaga tashlagan. Bu pullar aniq davlat hisobiga borib tushganmi yoki yo‘qmi? Qolaversa, na tergov va na sud davomida 1 milliard 600 million so‘mlik kamomad nima maqsadda qo‘yilganligiga aniqlik kiritilmagan.— Menga 243-modda (“Jinoiy faoliyatdan olingan daromadlarni legallashtirish”) bo‘yicha ayblov qo‘yildi. “Almaz zolotoy dvorets” restorani 4,5 milliard so‘mga baholandi. Undan tashqari, 6 ta avtomobil ham musodara qilindi. Umumiy hisobda 5,5 milliard so‘mlik mol-mulk musodara qilindi. Menga isbotlab berishlari kerak qancha pulni yashirganimni, — deydi Sherzod Burhonov. — Hali bular 1,6 milliard so‘mni isbotlab bermasdan musodara pullari davlatga o‘tkazib yuborilsin deyapti. Men tadbirkorman. Xalqimizga ish beryapman. O‘zingiz o‘ylang, 300 nafar fuqaro qo‘lingizda ishlasa bittadan bolasi bo‘lsa 600 kishi, ikkitadan bo‘lsa 900 kishi bo‘ladi. 900 kishini dimog‘i chog‘, qozoni qaynaydi, vaqtida oyligini oladi.
Sherzod Burhonovning ta’kidlashicha, sud jarayonida Samarqand shahar IIBning sobiq birinchi o‘rinbosari sudga kelib uni tanimasligini bildirgan. Tergov jarayonida tadbirkorga Jinoyat kodeksining 211-moddasi (“Pora berish”) to‘g‘ridan to‘g‘ri qo‘yilgan. Ammo sud hukm o‘qiyotganda 28-moddasi (“Jinoyat ishtirokchilarining turlari”) orqali 211-modda qo‘yilgan va 4 yil muddatga qamoq jazosi tayinlangan.
– Men advokatimdan 28-modda orqali ayblov qo‘yish nima deb so‘raganimda, bu pora beraman deb o‘ylagan, xayol qilgan deb tushuntirdi. Xayol qilganimga 4 yil olsam, bu juda kulgili emasmi? 45 ming dollar pora beraman, deb o‘y surgan ekanman. Nima, bular folbin bo‘lganmi?
Masalaning yana bir qiziq tomoni shundaki, Sherzod Burhonov qamalganidan so‘ng Oliy sud raisining sobiq o‘rinbosari Bahodir Dehqonov nazorat tartibida yozgan shikoyatidan so‘ng uning molk-mulklarini savdoga qo‘yishni to‘xtatgan.
—Murojaatimiz Bahodir Dehqonovga borib tushyapti. U Oliy sud nomidan kimoshdi savdosida qo‘yilgan narsalarni to‘xtatish bo‘yicha xat yuboryapti. Men bu xatni ko‘rib, ochig‘i, quvondim. Ammo bir oy davomida biz 1,6 milliard so‘mni to‘lashimiz kerak edi. Shunda qarzlarni to‘lash uchun advokatga 250 ming dollar berdik. Pul to‘lanishi bilan savdodan to‘xtatilgan narsalar yana o‘z kuchida qolib, savdoga chiqarildi, — deydi Sherzod Burhonov. — Men 1,6 milliard so‘mni to‘layapman, sotuvdan to‘xtatilib qarzlar qoplanganidan so‘ng yana mol-mulklar kimoshdi savdosiga chiqarib yuborilmoqda. Turmush o‘rtog‘im kelib vaziyatni tushuntirganidan so‘ng pulni qaytarib olinglar, deb aytdim. Menga o‘sha puldan 90 ming dollar qaytarib berilyapti. Qolgan 160 ming dollar pul ularda qolib ketgan. Bu yerda ham Bahodir Dehqonovning qo‘li bor deb o‘ylayapman. Negaki aynan Dehqonov savdodan to‘xtatish xatini yuborgandi. U meni ham qamab, ham mol-mulkimni savdodan olib qolaman deb ikki tomonlama ish qildi.
Sherzod Burhonov ishni qayta ko‘rib chiqish maqsadida 4 marotaba Oliy sudga murojaat qilgan. To‘rt marotaba ham “hukm o‘z kuchiga qoldi” degan javob kelgan. Oxirgi xat yozilganida Bahodir Dehqonov qamalgan.
— Meni 12 yil 6 oyga nohaq qamashdi. Barcha ishni qaytadan ko‘rib chiqishlarini, aybim bo‘lsa to‘liq isbotlab berishlarini istayman. 3 yil umrim o‘tib ketdi. Odilona sud ko‘rib chiqib, adolatli hukm chiqarish tarafdoriman. Asossiz qamoqda o‘tirish juda ham alam qilar ekan. Odam agar shu ishni qilgan bo‘lsa men shuni qildim-ku, shuning uchun o‘tiribman deydi. Ammo menda bu narsa yo‘q. Hammasi asossiz. Birorta aybim isbotlangani yo‘q. “Daryo”ga murojaat qilishim ham bejiz emas, chunki sizlar shikoyatimga e’tiborsiz bo‘lmadingiz, masalani mohiyatiga yetishga harakat qilyapsiz, — deydi Sherzod Burhonov.
Izoh (0)