Davlat xavfsizlik xizmati Samarqand va Namangan viloyatlarida firibgarlik bilan bog‘liq holatlarni aniqladi.
Xususan, DXXning Samarqand viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda tezkor tadbir o‘tkazildi. Tadbirda viloyat Davlat soliq boshqarmasi soliq nazorati bo‘limi bosh inspektori Past Darg‘om tumanida faoliyat yurituvchi masʼuliyati cheklangan jamiyatda o‘tkazilgan tekshiruvda aniqlangan 2,5 milliard so‘mlik soliq qarzdorligini ushbu tekshiruvni o‘tkazgan hamkasbi orqali 1 milliard so‘mga tushirib berishni va’da qilgani aniqlangan. Buning evaziga u 15 ming dollar olgan vaqtida ashyoviy dalillar bilan ushlangan.
Boshqa bir holatda esa Namangan shahrida faoliyat yurituvchi advokatlik firmasi advokati mahalliy fuqaroning maʼmuriy sudda ko‘rilayotgan mulkiy nizo bilan bog‘liq masalasini sud idoralarida ishlovchi tanishlari orqali uning foydasiga hal qilib berish evaziga 10 ming dollar so‘ragani ma’lum bo‘ldi.
Shuningdek, advokat ko‘rilayotgan ish doirasida ekspertiza xulosasini rasmiylashtirib berish evaziga 2 ming dollar, jami 12 ming dollar talab qilib, oldindan 7 ming dollar olgan vaqtida Davlat xavfsizlik xizmatining Namangan viloyati bo‘yicha boshqarmasi, viloyat prokuraturasi va Iqtisodiy jinoyatlarga qarshi kurashish departamenti xodimlari tomonidan ushlangan.
Hozirda mazkur shaxslarga nisbatan Jinoyat kodeksining 168 (firibgarlik) va 28, 211-moddalari (pora berish) bilan jinoyat ishlari qo‘zg‘atilib, qamoqqa olish tarzidagi ehtiyot chorasi qo‘llangan.
Izoh (0)