O‘zbekistonda fuqarolarga davlat xizmatlarini ko‘rsatish sifati oxirgi yillarda ancha o‘sganini ta’kidlash kerak. Avvalgi ko‘plab qog‘ozbozliklar yo‘qotilib, xizmat ko‘rsatish tezligi ancha oshdi. Ko‘plab qulayliklar yaratildi va yaratilmoqda. Shu bilan birga, fuqarolarning sarson va sargardonchiligiga sabab bo‘ladigan ayrim chalkashliklar hamon uchrab turganini ham bor gap.
“Daryo” tahririyatiga 72 yoshli onaxon murojaat qilib, ana shunday chalkashliklardan aziyat chekayotganini ma’lum qildi.
Onaxonning aytishlaricha, ularga MIB tomonidan Yangiyo‘l tumani sudi qarori topshirilgan. Qarorda Yangiyo‘l tumani “Tuyabo‘g‘iz” mahallasidagi xonadonlardan birining soliqlari o‘z vaqtida to‘lanmagani uchun 1 million so‘mdan oshiq qarzdorlik yuzaga kelgani, mazkur qarzdorlikni hamda o‘z vaqtida to‘lanmagani uchun jarimani va sud bojini to‘lash ko‘rsatilgan.
Onaxonning ta’kidlashicha, uzoq yillardan beri Toshkent shahridagi Yakkasaroy tumanida istiqomat qiladilar. Yangiyo‘lda hech qachon yashamaganlar. Faqat 2020-yilda Yangiyo‘l tumanidagi “Tuyabo‘g‘iz” mahallasida joylashgan o‘zlariga tegishli bo‘lgan yerni sotganliklarini ma’lum qildilar. Ammo yerga egalik huquqi bo‘lgani bilan propiska hamisha Toshkent shahrida bo‘lganini ta’kidladilar.
“Daryo” vakili vaziyatga oydinlik kiritish uchun onaxon bilan Yangiyo‘l tumani soliq idorasiga bordi. Soliq idorasi mas’uli bazadan tekshirib, haqiqatan ko‘rsatilgan manzildagi uy-joy boshqa fuqaroga tegishli ekani, ammo bazadagi pasport ma’lumotlari onaxonniki ekanini ma’lum qildi. Bu xato qanday yuzaga kelgani bo‘yicha savolga javob bera turib, “aybdorni izlash emas, masalani hal qilish kerak”ligini muloyimlik bilan tushuntirdi. Masalani hal qilish uchun esa Kadastr bo‘limiga yubordi.
Kadastr bo‘limidagi mas’ul esa muammoni eshitgach, “hozir tekshirib beraman” deb ichkariga kirib ketdi. Keyin esa chiqib: “Biz tomondan hech qanday muammo yo‘q. Mazkur uy-joy 2020-yilda qilingan oldi-sotdi shartnomasidagi fuqaroga tegishli ekani qayd etilgan”, deb aytdi. “Unda qanday qilib Yangiyo‘lda yashamaydigan onaxon nomiga soliqdan qarzdorlik borgan?” degan savolga propiskani tekshirish kerakligini aytib, “pasport stoli”ga yubordi.
“Pasport stoli”dagi mas’ul esa muammoni eshitib, hozir tekshirib beramiz, deb bazaga ma’lumotlarni kiritdi. “Sizning propiskangiz Yangiyo‘l tumani Tuyabo‘g‘iz mahallasida ekan”, dedi keyin.
“Qanaqasiga, axir bu manzilda umuman yashamaganman-ku, bir umr Toshkentda istiqomat qilganman”, degan e’tirozga “balki chalkashlik yuzaga kelgandir”, deb javob berdi.
“Endi siz Yakkasaroy tumani pasport stoliga borib, propiskangizni o‘zingiz yashaydigan joyga qo‘yishingiz kerak. Shunda avtomatik ravishda Yangiyo‘ldan propiskadan o‘chasiz”, dedi.
“Shunda soliq bo‘yicha noto‘g‘ri qarzdorlik boshqa kelmaydimi?” deb so‘radik mas’uldan. “Sud qarorini bekor qilish uchun Yangiyo‘l tumani sudiga borib, apellyatsiya berishingiz kerak. Buning uchun o‘zingiz yashaydigan mahalla idorasiga borasiz. Mahalla raisi o‘sha yerda uzoq yillardan beri yashayotganingiz haqida akt tuzib beradi. O‘sha aktni olib, sudga ko‘rsatasiz”, degan javobni eshitdik.
Qiziq. Qaysidir tizimdagi qaysidir mas’ulning qachondir yo‘l qo‘ygan aybi tufayli 70 yoshdan oshgan onaxon Toshkent va Yangiyo‘l tumani orasida sarson-sargardon bo‘lmoqda. Barcha ma’sul idoralar ayb ularda emasligini ta’kidlamoqda va boshqa idoraga borib masalani hal etishni maslahat beryapti. Aybdor yo‘q, lekin sarson bo‘layotgan fuqaro bor.
Izoh (0)