Qashqadaryo viloyatida tadbirkordan Soliq organlari tomonidan undirib olingan 520 million so‘m qaytib berilmayapti. Bu haqda “Hamkor Taʼminot Gold Invest” MCHJ rahbari Jamshid Eshonqulov “Daryo”ga maʼlum qildi.
Tadbirkor Jamshid Eshonqulovning aytishicha, u Jinoyat ishlari bo‘yicha Koson tuman sudining 2024-yil 22-iyundagi hukmiga ko‘ra Jinoyat kodeksining 184-moddasi (soliqlar yoki yig‘imlarni to‘lashdan bo‘yin tovlash juda ko‘p miqdorda sodir etilgan bo‘lsa) va boshqa bir nechta moddalarga ko‘ra aybli, deb topilgan. Hukmga ko‘ra, 587 million so‘mi Koson tuman davlat soliq inspeksiyasi (DSI) ning tegishli hisob raqamiga o‘tkazib berilgan.
Oradan ikki yil o‘tib — 2024-yilning 13-sentyabr kuni Qashqadaryo viloyat jinoyat ishlari bo‘yicha sudlov hayʼati apellyatsiya instansiyasida Jinoyat ishlari bo‘yicha Koson tuman sudining 2022-yil 22-iyundagi Jamshid Eshonqulovga nisbatan chiqarilgan hukmi qisman o‘zgartirilgan. Yaʼni Jamshid Eshonqulovning qilmishida jinoyat alomatlari bo‘lmaganligi sababli Jinoyat kodeksining 184-moddasining 3-qismi bilan aybsiz deb topilgan.
Hukmga ko‘ra, Koson tuman DSIdan Jamshid Eshonqulovga 520 million so‘mni qaytarib berish belgilangan. Qolgan 66 million so‘m maʼmuriy ish materiali bilan birga hal qilish uchun qoldirilgan.
MIB axborot xizmatining “Daryo”ga maʼlum qilishicha, qarzdorlikni Jamshid Eshonqulov foydasiga undirish maqsadida Qashqadaryo viloyat DSBning barcha hisob raqamlariga band solingan.
Kelgusida qarzdorlik bartaraf etilmagan taqdirda, undiruv qarzdorning mol-mulklariga qaratiladi, deyiladi MIB izohida.
Davlat soliq qo‘mitasining “Daryo”ga tushuntirish berishicha, “Hamkor Taʼminot Gold Invest” MCHJ Koson tumanlararo iqtisodiy sudining hal qiluv qaroriga asosan, 2024-yilda korxona bankrot deb eʼtirof etilib, davlat reyestridan chiqarilgan. Shu sababli bugungi kunda 520 million so‘m mablag‘ni korxona hisob raqamiga qaytarishning imkoni bo‘lmagan.
“Qashqadaryo viloyat soliq boshqarmasi tomonidan J.Eshonqulov foydasiga 520,9 million.so‘m undirish belgilangan Sud ajrimi bo‘yicha viloyat jinoyat ishlari bo‘yicha sudlov hayʼati taftish instansiyasiga taftish shikoyati kiritildi”, deyiladi Davlat soliq qo‘mitasi izohida.
Izoh (0)