Samarqandda ikki nafar soliq inspeksiyasi xodimi pora olganlikda ayblanib, sudlandi. Bu haqda “Zamon” informatsion dasturida ma’lum qilindi.
Sud hujjatlariga ko‘ra, Samarqand tumani soliq inspeksiyasi xodimi Bulung‘ur tumanida tadbirkorlik bilan shug‘ullanuvchi fuqaroga korxonasining soliq bazasida jismoniy shaxslardan olinadigan daromad va ijtimoiy soliqlardan asossiz hisoblangan qarzdorlikni kamaytirishda yordam berishini aytgan.
Soliqchi ushbu “xizmati” evaziga 1000 dollar talab qilgan. Shundan so‘ng u tadbirkorning 300 millionga yaqin soliq va penya qarzdorligini kamaytirishda Bulung‘ur tumani soliq inspeksiyasida kameral soliq tekshiruvlari sho‘basi boshlig‘i lavozimida ishlovchi tanishini sherik qilgan.
Soliqchi Samarqand shahridagi kafelardan birida tadbirkordan 500 dollar olayotganda ashyoviy dalillar bilan ushlanadi.
Jinoyat ishlari bo‘yicha Samarqand shahar sudida o‘tkazilgan sud majlisida soliq xodimlariga hukm o‘qilgan. Ularning ikkalasi ham Jinoyat kodeksining 210-moddasi (Pora olish) 2-qismi “v” bandi bilan aybdor deb topilib, 5 yilga ozodlikdan mahrum qilingan.
Avvalroq Samarqandda ikki nafar hokim yordamchisi 1000 dollar pora bilan qo‘lga tushgani to‘g‘risida xabar berilgandi.
Izoh (0)