UFC sobiq chempioni Habib Nurmagomedov yana soliq bilan bog‘liq muammolar sabab e’tibor markazida. “Mash na sporte” nashri xabariga ko‘ra, sportchining bankdagi hisoblari Rossiya Federal soliq xizmati tomonidan bloklangan. Sababi, u 2024-yil uchun daromad deklaratsiyasini o‘z vaqtida topshirmagan.
Bu Habibning moliyaviy muammolarga duch kelishi bo‘yicha ilk holat emas. O‘tgan yili ham sud ijrochilari Nurmagomedovning 79 million rublga teng mol-mulkini xatlagan edi. Chunki unda 302 million rubl miqdoridagi soliq qarzi mavjud bo‘lgan. O‘sha vaqtda Habibning quyidagi mol- mulklari musodara musodara qilinishi xavf ostida qolgan edi:
- Ferrari California T (300 ming dollar)
- Mercedes-Benz AMG GT S (161 ming dollar)
- Mercedes-Benz S-Class (122 ming dollar)
- BMW 7 Series (101 ming dollar)
- Toyota Land Cruiser (85 ming dollar)
- Toyota Tacoma (44 ming dollar)
- Dog‘istondagi hashamatli uy
Bundan tashqari, Habibga tegishli Eagle FC promousheni, unga aloqador xayriya fondi va shaxsiy hisoblar ham vaqtincha bloklangan edi. Ammo oradan bir hafta o‘tib, Nurmagomedov qarzdorlikni to‘liq qoplab, mol-mulklariga qo‘yilgan cheklovlar olib tashlangandi.
Eslatib o‘tamiz, Habib Nurmagomedov UFC’dagi so‘nggi jangini 2020-yil 24-oktyabr kuni UFC 254 turnirida o‘tkazgan. U Jastin Geydjini ikkinchi raundda bo‘ysundirish usuli bilan mag‘lub etib, faoliyatini 29 g‘alaba (0 mag‘lubiyat) bilan yakunlagan edi. Ushbu jangdan so‘ng u onasiga bergan va’dasi tufayli faoliyatini yakunlashini ma’lum qilgan.
Izoh (0)