Respublikada to‘rt oydan ortiq vaqt ichida 1,1million yangi ish o‘rni yaratildi. Bu haqda Bandlik vazirligi Mehnat inspeksiyasi rahbari o‘rinbosari Nilufar Amanniyazova “Daryo”ga bergan intervyusida maʼlum qildi.
Nilufar Amanniyazovaning aytishicha, yangi ish o‘rinlarining asosiy qismi qishloq xo‘jaligi, qurilish, xizmat ko‘rsatish sohalarida hamda o‘z-o‘zini band qilganlar hisobiga taʼminlangan.
“Joriy yilning o‘tgan davrida respublika bo‘yicha 1,1 million yangi ish o‘rinlari yaratildi. Ish o‘rinlari hisoboti quyidagicha shakllantiriladi: A korxonada 10 nafar odam ishga qabul qilindi. Ish beruvchi Yagona milliy mehnat tizimidan mehnat shartnomasini ro‘yxatdan o‘tkazadi, ishga qabul qilingan xodim bo‘yicha ish beruvchi keyingi oyning 15-sanasigacha daromad va ijtimoiy soliq to‘langani to‘g‘risida hisobot topshiradi. Soliq hisobotlari asosida tasdiqlangan ish o‘rinlari yangi ish o‘rni deb hisobga olinadi. Yangi ish mehnat.uz hamda soliq organlarining axborot tizimlari bilan integratsiya qilingan bo‘lib, hisobotlarni shakllantirishda inson omili mavjud emas”, dedi inspeksiya masʼuli.
Shu bilan birga, inspeksiya norasmiy ishlayotganlar faoliyatini rasmiylashtirish yo‘nalishida ham ishlamoqda.
“2025-yil fevral oyidan beri inspektorlar mamlakat bo‘yicha 22 ming 900 ta norasmiy ishchilar faoliyatini legallashtirgan. Legallashtirish asosan qurilish, ishlab chiqarish, umumiy ovqatlanish va xizmat ko‘rsatish sohalariga to‘g‘ri keldi”, deydi Nilufar Amanniyazova.
Qayd etilishicha, inspeksiya vakillari korxonalar rahbarlariga ishchilarni nolegal ishlatishning salbiy oqibatlarini tushuntirmoqda. Faoliyati legallashtirilgan xodimlar maxsus dastur orqali doimiy kuzatuvda bo‘lib, qayta norasmiy ishlashga yo‘l qo‘yilmasligi taʼminlanmoqda.
Izoh (0)