Din ishlari bo‘yicha qo‘mita fuqarolarga murojaat bilan chiqib, noqonuniy yo‘llar bilan hajga borish oqibatlarini eslatdi.
Saudiya Arabistoni Haj va umra vazirligidan kelib tushgan xabarnomaga ko‘ra, ruxsatnomasiz haj amallarini bajarishga harakat qilish tegishli tartibda javobgarlikka tortiladi. Shuningdek, bu borada Saudiya Ichki ishlar vazirligining maxsus bayonoti ham ilova qilingan. Belgilangan tartibga muvofiq haj amallarini bajarish uchun ziyoratchida “Haj-2025” vizasi bo‘lishi shart. Saudiya Arabistoni hukumati qolgan barcha turdagi vizalar — umra, turizm, biznes, ziyorat va boshqalar bilan haj tadbirini amalga oshirishga qatʼiy yo‘l qo‘ymaydi.
“Tushuntirish va ogohlantirishlarga qaramay, hozirda ayrim turfirmalar va uchinchi davlatlar orqali fuqarolarimizni haj ziyoratiga jo‘natishga harakatlar kuzatilmoqda”, deyiladi qo‘mita xabarida.
Saudiya huquq tartibot idoralari tomonidan amalga oshirilayotgan reydlar natijasida noqonuniy ravishda haj ibodatini amalga oshirishga uringan shaxslarga nisbatan jazo choralari qo‘llaniladi va mamlakatdan deport qilinadi.
Xususan, noqonuniy yo‘llar bilan haj amallarini bajarish 20 mingdan 100 ming saudiya riyoligacha (27 ming AQSH dollarigacha) moliyaviy jarimalar qo‘llanishiga sabab bo‘ladi. Shuningdek, fuqaroni Saudiyadan deportatsiya qilishdan tashqari keyingi 10 yil davomida podshohlikka kirishi taqiqlanganlar ro‘yxatiga kiritilishi belgilangan.
O‘zbekistonda haj tadbiri Vazirlar Mahkamasining 2017-yil 7-iyundagi “Haj va umra tadbirlarini tashkil etish va o‘tkazishni yanada takomillashtirish chora-tadbirlari to‘g‘risida”gi qarori asosida o‘tkaziladi.
Shunga ko‘ra, haj tadbiri Din ishlari bo‘yicha qo‘mita va Saudiya Arabistoni podshohligi Haj va umra vazirligi o‘rtasida har yili imzolanadigan shartnoma asosida O‘zbekiston musulmonlari idorasi tomonidan amalga oshiriladi hamda bunday faoliyat bilan boshqa tashkilotlarning shug‘ullanishiga yo‘l qo‘yilmaydi.
“Shunday ekan, yurtdoshlarimizni turli aldov yo‘llari bilan hajga olib borishni vaʼda qilayotgan firibgarlarga ishonmaslikka chaqiramiz. Ogoh bo‘ling, firibgarlarga aldanmang”, deyiladi qo‘mita xabarida.
“Haj-2025” mavsumi haqida
O‘zbekistonda 13—28-may kunlari ziyoratchilar 9 ta hudud — Toshkent, Buxoro, Namangan, Samarqand, Qarshi, Termiz, Urganch, Navoiy va Nukus shaharlaridagi aeroportlar orqali Madina shahriga kuzatiladi. Ular uchun Madina shahrida muhtasham Zam-zam Pullman mehmonxonasi, Makkada Marmara hotel, Romance hotel, Al-Ayyam elite, Concrete hotel, Abroj Dania, Paradise, Open hotel va Ayyed saha kabi 8 ta mehmonxonada barcha shart-sharoitlar yaratilib, hojilarni yuqori saviyada kutib olishga shay qilindi. “Haj – 2025” mavsumida hojilarga 14 nafar mingboshi, 303 nafar ellikboshi xizmat qiladi. Shuningdek, ishchi guruhi, shifokorlar va oshpazlar jalb qilingan.
Haj narxi
2019-yilda O‘zbekistonda bir kishining hajga borib kelishi 33,3 mln so‘mni (o‘sha paytdagi kurs bo‘yicha 3879 dollar) tashkil etgan. Pandemiyadan so‘ng 2022-yilga kelib haj ziyorati narxi keskin (deyarli ikki baravar) oshgan va bir kishilik to‘lov 62 million 900 ming so‘m etib belgilandi. O‘shanda Musulmonlar idorasi narx qimmatlashishiga Saudiya hukumati haj safariga doir qo‘shimcha soliq va majburiy to‘lovlar joriy etgani, transport hamda boshqa qator xizmatlar qiymati keskin oshganini sabab qilib ko‘rsatgan edi. Shundan so‘ng ham narxlar oshishda davom etdi — 2023-yilda 68 million 760 ming so‘m, 2024-yilda esa 73 million 970 ming so‘mni tashkil etgan. O‘zbekistonlik ziyoratchilar 2025-yilgi haj mavsumi uchun 78 million 670 ming to‘laydi.
Haj uchun to‘langan mablag‘ ichiga nimalar kiradi?
- haj vizasi;
- aviabilet (Madinayi munavvaraga to‘g‘ridan to‘g‘ri aviareys);
- Zam-zam Pullman, Kraun Plaza (Madina shahrida) hamda Abroj al-Hidoya (Makka shahrida) mehmonxonalarida yashash;
- shaharlararo (Madina—Makka—Jidda) transport xizmati;
- hojilarning tibbiy sug‘urtasi;
- 3 mahal issiq ovqat: nonushta, tushlik va kechki ovqat;
- Madinadagi Uhud tog‘i, Qubo va ikki qiblali masjidlarga ziyorat;
- Makkadagi Mino, Arofat va Muzdalifa vodiylaridagi barcha xizmatlar;
- 24/7 rejimidagi tibbiy xizmat;
- 24/7 rejimidagi transport xizmati;
- qurbonlik;
- zamzam suvi (5 litr);
- respublikaning 7 ta hududidan kuzatish va kutib olish;
- davlat ramzlari tushirilgan nimcha va sumka;
- haj qo‘llanmasi.
O‘zbekistonda haj kvotasi so‘nggi yillarda 3 barobarga oshirilgan
O‘zbekistonliklar uchun haj kvotasi so‘nggi yillarda 3 barobarga oshirilgan bo‘lib, har yili 15 ming nafar o‘zbekistonliklar hoji bo‘lmoqda, 2024-yilgi haj mavsumida O‘zbekistonda 15 150 nafar ziyoratchi haj amalini bajargan.
2025-yilda O‘zbekistondan 15 259 nafar fuqaro hajga boradi. Bu yil eng ko‘p ziyoratchilar Toshkentdan boradi — 22 ta reysda 5607 nafar yo‘lovchi. Namangandan 20 ta, Samarqanddan 4 ta, Buxoro va Qarshidan 2 ta, Termizdan 4 ta, Urganch va Navoiydan 2 ta, Nukusdan 1 ta reys uchadi.
Izoh (0)