Samarqand viloyati Jomboy tumanida 2020-yilning iyulida auksion orqali xotinining nomiga olingan 2 gektar yer maydonining bir qismini sotishga uringan shaxs qo‘lga olindi. Bu haqda “O‘zbekiston 24” telekanalida ma’lum qilindi.
Ma’lum qilinishicha, ushbu fuqaro yerni 2 yilda 1 milliard so‘m investitsiya kiritish sharti bilan olgan.
Muqaddam IIO va soliq idoralarida rahbar lavozimlarida ishlagan mazkur shaxs ushbu yer maydonining 40 sotixini hokimiyatdagi tanishlari orqali kadastr hujjatlarini rasmiylashtirib, xaridor nomiga o‘tkazib berish uchun 19,5 ming dollar talab qilgan. U oldindan 15 ming AQSh dollarini olgan vaqtida tezkor tadbirda ushlangan.
Shuningdek, Qarshi shahrida Qarshi tumani hokimligida qishloq xo‘jaligi bo‘limi mutaxassisi o‘zining fermer xo‘jaligi balansida bo‘lgan 9 gektar suvli yer maydonini 9,5 ming dollarga sotgan vaqtida qo‘lga olingan.
Aniqlanishicha, u muqaddam firibgarlik jinoyati bilan sudlangan.
Hozirda ushbu shaxslarga nisbatan Jinoyat kodeksining tegishli moddalari bilan jinoiy ish qo‘zg‘atilib, tergov olib borilmoqda.
Avvalroq Toshkentda yer olib berishni va’da qilib, fuqarodan 52 800 dollar olgan shaxs ushlangani, Andijonda 100 gektar yer ajratib berish evaziga 128 ming dollar pora olgan mansabdor shaxslarga sud hukmi o‘qilgani, Farg‘onada Koreyadagi universitetga imtihonsiz kiritib qo‘yishni va’da qilib, maktab o‘quvchilaridan jami 20 million so‘m olgan shaxslar aniqlangani hamda Angrenda 3,5 ming dollar evaziga Jismoniy tarbiya universitetiga kiritib qo‘ymoqchi bo‘lgan shaxs ushlangani haqida xabar berilgandi.
Izoh (0)