O‘zbekistonda 2025-yil 1-iyundan boshlab turizm sohasiga oid barcha davlat elektron tizim platformalari Milliy turizm yagona platformasi doirasida ishlab chiqiladi.
“2025—2026-yillarda sayyohlar oqimini keskin ko‘paytirish va turistik xizmatlar ko‘lamini jadal kengaytirish orqali turizmning iqtisodiyotdagi o‘rni va ahamiyatini oshirish chora-tadbirlari to‘g‘risida”gi farmonida belgilanishicha, bunda platforma orqali joylashtirish vositalarini onlayn band qilgan O’zbekiston fuqarolariga shaxsni tasdiqlovchi hujjatsiz MyID tizimi orqali identifikatsiyadan o‘tishga ruxsat beriladi.
Platformaga ulangan joylashtirish vositalarining shaxsiy kabinetida mehmonni QR kod yoki yuz orqali identifikatsiya qilish imkoniyati yaratiladi.
Hujjatda 2025-yil 1-sentyabrga qadar platforma orqali axborot almashinuvi yo‘lga qo‘yilishi lozim bo‘lgan vazirlik va idoralarning ro‘yxati keltirildi. Unga ko‘ra,
- iyungacha — “Aviachiptalarni xarid qilish va boshqarish” axborot tizimi;
- avgustgacha — “Temiryo‘l chiptalarini xarid qilish va boshqarish axborot tizimi”, kadastr obyektlari to‘g‘risidagi ma’lumotlar, turizm sohasiga oid yig‘ma statistik ma‘lumotlar, MyID axborot tizimi, aloqa operatorining turistlar harakatlari to‘g‘risidagi ma’lumotlari (shaxsga doir bo‘lganlaridan tashqari), bankomatlar to‘g‘risidagi ma’lumotlar; chet el fuqarolarning O‘zbekistonga kirgani va chiqqani haqida ma’lumotlar
- iyulgacha — “Avtoticket.uz” axborot tizimi; ATTO axborot tizimi;
- sentyabrgacha — “Ijara.soliq.uz” axborot tizimi;
- dekabrgacha — elektron viza berish tizimi, bilet operatsiyalari yagona elektron tizimi
- 2026-yil iyulgacha — Raqamli sog‘liqni saqlash platformasi axborot almashinuvi yo‘lga qo‘yilishi kerak.
Milliy turizm yagona platformasi haqida
Shavkat Mirziyoyev raisligida hududlarda turizm infratuzilmasini yaxshilash va xorijiy turistlar oqimini yanada ko‘paytirish chora-tadbirlari yuzasidan 2024-yil 3-iyun kuni o‘tkazilgan videoselektor yig‘ilishida sayyohlar mahalliy reyslarga samolyot va poyezd uchun ikki oy u yoqda tursin, yarim yil oldin chipta olishda qiyinchiliklarga duch kelayotgani qayd etilgandi. Mutasaddilarga barcha qatnovlar haqida maʼlumot va chipta olish imkonini beradigan yagona onlayn platformani ishga tushirish topshirilgandi.
Prezidentning 2024-yil 18-iyuldagi farmonida ushbu platforma 2024-yil 1-dekabrgacha ishga tushirilishi ko‘zda tutilgandi. O‘sha yilning dekabrida turistik xizmatlarni yagona platformaga birlashtirish chora-tadbirlari to‘g‘risidagi hukumat qarori qabul qilindi. Qarorga ko‘ra, ushbu platforma 2025-yil 1-sentyabrdan boshlab sinov tariqasida, 2025-yil 1-dekabrdan esa to‘liq ishga tushiriladi. Platforma ma’lumotlarining 14 ta xorijiy tilga tarjimasi ta’minlab boriladi.
Izoh (0)