Сурхондарё вилоятида 6 фарзанднинг онаси чақалоғини 62 млн сўмга сотаётганда ушланди.
Маълум қилинишича, 1989 йилда туғилган 6 нафар фарзанднинг онаси 7 кунлик чақалоғини 62 млн сўмга сотмоқчи бўлган. Ҳолат 2024 йилнинг 13 ноябрь куни содир бўлган.
Сурхондарё вилояти транспортда хавфсизлик таъминлаш бўлими тезкор ходимлари томонидан Жарқўрғон туманида ўтказилган тезкор тадбир давомида она ўз фарзандини сотган вақтида ушланган. У уй олиш мақсадида ушбу жиноятни содир этган. Турмуш ўртоғи 2-гуруҳ ногирони экани, оилавий шароити оғир эканини, яшаш уйи йўқлигини сабаб қилиб кўрсатган.
Ҳолат юзасидан иш Жиноят ишлари бўйича Жарқўрғон туман судида кўриб чиқилди. Суд ҳукми билан аёл 3 йилга озодликдан маҳрум қилинди.
Бундан аввал ҳам шу каби ҳолат кузатилган. Қашқадарёда эр-хотин уй олиш мақсадида бир ҳафталик чақалоғини 190 млн сўмга пуллагани ҳақида хабар берилганди. Бундан олдин Тошкент вилоятида бир ёшли ўғлини 9 минг долларга сотишга уринган эр-хотинга суд ҳукми ўқилгани, Самарқандда аёл уй олиш учун 6 ёшли ўғлини 6 минг долларга сотмоқчи бўлганида қўлга олингани ҳақида хабар берилганди.
Изоҳ (0)