Самарқанд вилоятининг Оқдарё туманида уч кунлик чақалоғини 50 миллион сўмга сотиб юбормоқчи бўлган аёл 5 йил-у 6 ойга озодликдан маҳрум этилди. Бу ҳақда “Севимли” телеканалининг “Замон” информацион дастурида хабар берилди.
Маълум қилинишича, турмушидан ажрашган аёл бошқа бир йигитдан ҳомиладор бўлиб, уни яқинларидан яширишга уринган. Туғилажак фарзандини Самарқанд туманида яшовчи аёлга 50 миллион сўмга сотишга келишган. 5 июнь куни аёл уч кунлик қиз фарзанди учун келишилган пулларни олаётганида ушланган.
Судда аёл айбини тўлиқ тан олиб, қилмишидан пушаймонлигини билдирган. Суд Жиноят кодексининг 135-моддаси 3-қисми “а” банди (18 ёшга тўлмагани айбдорга аён бўлган шахсга нисбатан содир этилган одам савдоси) ва 57-моддасига (енгилроқ жазо тайинлаш) асосан аёлни 5 йил-у 6 ой муддатга озодликдан маҳрум қилди.
Изоҳ (0)