Ижтимоий тармоқларда аёл гўдак болани ураётгани акс этган видео тарқалганди. Ҳолат болалар омбудсмани томонидан ўрганилганда ҳолат 1 йил аввал содир бўлгани аниқланди.
Олиб борилган текширув натижаларига кўра, Сурхондарё вилояти Сариосиё туманида яшовчи фуқаро Т.М. (2001 йилда туғилган аёл) 2024 йилнинг май ойида собиқ турмуш ўртоғи А.Қ. (1994 йилда туғилган эркак) билан жанжаллашиб, бола учун алимент ва бошқа моддий таъминот бермагани важи билан болани отасига босим қилиб қўрқитиш мақсадида видео қўнғироқ қилиб, фарзанди А.Р (2023 йилда туғилган қиз) ни уриб тасвирга олган ва уни собиқ турмуш ўртоғига юборган.
Телефондаги ёзишмаларда болани ўлдириш билан таҳдид қилгани ҳақидаги гапларни ҳам ўқиш мумкин. “Ўзим туққанман, ўзим ўлдираман”, дейилган чақалоқ видеоси юборилган ёзишмада.
Терговга қадар текширувда боланинг соғлиғига зарар етмагани аниқлангани сабабли 2024 йил 14 майда ҳолат юзасидан аёл Маъмурий жавобгалик тўғрисидаги кодекснинг тегишли моддалари билан ҳуқуқбузарлик содир қилган деб топилиб, Жиноят ишлари бўйича Сариосиё туман суди томонидан унинг жавобгарлиги масаласи ҳал этилган.
Қайд этилишича, ҳозирда аёл собиқ турмуш ўртоғи ва унинг оила аъзолари билан ўзаро низо вазиятида бўлиб, бу борада терговга қадар текширув ҳаракатлари олиб борилмоқда.
2025 йил бошларида Тошкент вилоятида онаси томонидан калтакланган 4 ёшли қиз вафот этганди. Ҳолат юзасидан жиноят иши қўзғатилиб, аёл қамоққа олинган. 27 январь куни Тошкент вилоятида қайнона-келин жанжали сабаб чақалоқ куйиб қолганди. Олмалиқда аёл ширинликларни рухсатсиз еган боласининг тана аъзоларига пахта тиқиб, ёққани ҳақида ҳам хабар берилганди.
2024 йил 14 ноябрда “Болаларни зўравонликнинг барча шаклларидан ҳимоя қилиш тўғрисида”ги қонун қабул қилинганди. Қонун 2025 йил 15 майдан кучга киради. Унда болаларни зўравонликнинг барча шаклларидан ҳимоя қилиш бўйича умумий ва индивидуал чора-тадбирлар белгилаб берилган.
Изоҳ (0)