Surxondaryo viloyatida 6 farzandning onasi chaqalog‘ini 62 mln so‘mga sotayotganda ushlandi.
Ma’lum qilinishicha, 1989-yilda tug‘ilgan 6 nafar farzandning onasi 7 kunlik chaqalog‘ini 62 mln so‘mga sotmoqchi bo‘lgan. Holat 2024-yilning 13-noyabr kuni sodir bo‘lgan.
Surxondaryo viloyati transportda xavfsizlik ta’minlash bo‘limi tezkor xodimlari tomonidan Jarqo‘rg‘on tumanida o‘tkazilgan tezkor tadbir davomida ona o‘z farzandini sotgan vaqtida ushlangan. U uy olish maqsadida ushbu jinoyatni sodir etgan. Turmush o‘rtog‘i 2-guruh nogironi ekani, oilaviy sharoiti og‘ir ekanini, yashash uyi yo‘qligini sabab qilib ko‘rsatgan.
Holat yuzasidan ish Jinoyat ishlari bo‘yicha Jarqo‘rg‘on tuman sudida ko‘rib chiqildi. Sud hukmi bilan ayol 3 yilga ozodlikdan mahrum qilindi.
Bundan avval ham shu kabi holat kuzatilgan. Qashqadaryoda er-xotin uy olish maqsadida bir haftalik chaqalog‘ini 190 mln so‘mga pullagani haqida xabar berilgandi. Bundan oldin Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani haqida xabar berilgandi.
Izoh (0)