Тошкент шаҳри Янгиҳаёт туманида фарзандини сотган аёлга жазо тайинланди. Бу ҳақда Даракчи хабар қилди.
Маълум бўлишича, она харидордан олган пулга уй-жой қилиб, оиласига ёрдам бермоқчи бўлган. Суд мажлисида аёл бу ишни танишининг қистови билан қилганини айтган.
«Бир йигит билан яқин муносабатда бўлиб, ундан ўғил фарзанд кўрдим. Икки фарзандим билан Тошкентда ижарада яшаб келаётгандим. Олдимга танишим келиб, ўғлингизни бирорта одамга беринг, қийналяпсиз, 3—4 минг доллар беради, деди. Унга жавобан ўйлаб кўришим кераклигини билдирдим. Эртаси куни танишим чақалоғингни сотиб оладиган одам келяпти, болангни кўраркан, деганида йўқ, керак эмас, деб айтдим. Жиннилик қилма, деб гапимни бўлди у. Боқишга қийналиб юрибсан-ку, уй-жой қилиб оласан, деди. Танишимнинг шу гапидан кейин боламни сотишга қарор қилдим.
Харидор аёлга 4 минг доллар берса, боламни беришимни айтдим. Ундан келишилган пулни олдим. Шу пайт департамент ходимлари ушлади», — дейди аёл суддаги кўрсатмаларида.
Суд уларга жазо тайинлашда айбларига иқрорлиги, қилмишларидан чин кўнгилдан пушаймонлиги, илгари судланмаганини, уларнинг содир қилинган жиноятда иштирокчиликдаги ролини инобатга олиб, жазо тайинлаган.
Саккиз ойлик чақалоғини сотган она 3 йил 6 ой муддатга, харидор топган таниши эса 5 йил муддатга озодликдан маҳрум этилган.
Бундан олдин Тошкент вилоятида бир ёшли ўғлини 9 минг долларга сотишга уринган эр-хотинга суд ҳукми ўқилгани, Самарқандда аёл уй олиш учун 6 ёшли ўғлини 6 минг долларга сотмоқчи бўлганида қўлга олингани ҳамда Навоийда фарзандини 85 миллион сўмга сотишга уринган эр-хотин жиноят устида қўлга олингани ҳақида хабар берилганди.
Изоҳ (0)