Жиноят ишлари бўйича Самарқанд шаҳар судида фарзандини 20 минг долларга сотмоқчи бўлган ота-она ва уларга харидор топиб берган дугонасига нисбатан ҳукм ўқилди. Бу ҳақда Олий суд матбуот хизмати хабар берди.
Қайд этилишича, Қаршидаги университетлардан бирининг талабаси бўлган 22 ёшли қиз Telegram гуруҳларига буйрагини сотиш ҳақида эълон жойлаштириб, харидор излаган. Эълон орқали у билан танишган Азиз исмли самарқандлик йигит қизни буйрагини сотиш фикридан қайтарган.
Онамнинг ўт қопида тошлар бор, уни даволатиш, контрактимни тўлаш учун буйрагимни сотмоқчиман, деб ёздим, — дейди айбланувчи.
Йигит кўпдан бери бола асраб олиш ниятида эканини айтиб, ёрдам берса, 20 минг доллар ишлаб олишга қизиқтирган. Шундан сўнг қиз ўзи билан ошхонада ишловчи официант дугонасига бола асраб олмоқчи бўлган одамнинг таклифини етказган. Қиз бола учун 10 минг доллар беришини айтиб, қолган 10 минг долларни ўзига олиб қолмоқчи бўлган.
Ҳаммадан оилали эканини яшириб юрган шериги фарзандини сотишга рози бўлган. 8 апрель куни эълон муаллифи боласини сотишга кўндирган дугонаси, унинг турмуш ўртоғи билан Самарқандга борган.
Фарзандимизни боқа олмадик, қийналдик, яхши оилага бериш мақсадида Самарқандга келдик… Биз квартирада турардик, тўлашга шароитимиз бўлмади. Пулга уй олмоқчи эдик, фарзандимизни қайтариб беришса бўлди, — дейди эркак.
Шу куни шаҳарнинг “Регистон” маҳалласида 8 ойлик қизчани 20 минг долларга сотиш вақтида қўлга олинган.
Суд ҳукми билан отаси 6 йил, онаси эса 3 йил муддатга озодликдан маҳрум этилди. Ўртада воситачилик қилмоқчи бўлган қашқадарёлик қизга эса 5 йил муддатга озодликдан маҳрум этиш жазоси тайинланди.
Бундан олдин Тошкент вилоятида бир ёшли ўғлини 9 минг долларга сотишга уринган эр-хотинга суд ҳукми ўқилгани, Самарқандда аёл уй олиш учун 6 ёшли ўғлини 6 минг долларга сотмоқчи бўлганида қўлга олингани ҳамда Навоийда фарзандини 85 миллион сўмга сотишга уринган эр-хотин жиноят устида қўлга олингани ҳақида хабар берилганди.
Изоҳ (0)