“Эрим қизимни тан олмади” — 27 ёшли аёлни ўз фарзандини пуллашга нима мажбур қилди?

“Надомат” лойиҳасининг навбатдаги суҳбатдоши айни дамда 21-сонли аёллар колониясида жазо муддатини ўтамоқда. У Ўзбекистон Республикаси Жиноят кодексининг 135-моддаси 3-қисми “а” банди билан айбдор деб топилиб, 3 йилга озодликдан маҳрум қилинган.

Маҳкума — 27 ёшда. У янги туғилган чақалоғини 90 миллионлик кредитини қоплаб бериш эвазига бегона инсонларга сотаётган пайтда қўлга олинган.

— Оилада битта қизман, уч укам, ота-онам бор эди. Турмуш ўртоғим, қизим билан тинч-тотув яшардик. Отам 2-гуруҳ ногирони, соғлиғи ёмонлаша бошлагач, онамда ҳам саратон касаллиги бошланди. Ота уйимга бориб онамнинг парваришига вақт ажратганим орқасидан оиламда тушунмовчиликлар келиб чиқди. Шу орада онам вафот этди. Оилавий жанжаллар борган сари кўпайди, чидолмай охири ажрашдим, — дейди маҳкума.

— Ажрашган пайтим 3 ойлик ҳомиладор эдим. Эримнинг фарзанд мендан эмас, кўчадан орттиргансан деган гапларидан тушкунликка тушиб қолгандим. Аборт қилиш фикри келди, лекин шароитимни биладиган бир аёл бор эди. Опаси 16 йилдан бери фарзанд кўролмаётган экан, фарзандим туғилгач, сотиб олишини айтди. Ўзим квартирада яшардим, яна онамдан қолган кредитлар, қарзлар бор эди.  Фарзандинг яхши шароитда яшайди, еб-ичиши яхши бўлади, университетда ўқийди, деган гапларига ишониб бу жиноятга рози бўлдим, — дейди у.

“Қизим туғилгач, ҳеч кимга бергим келмади, бермайман деб қатъий қарор қилдим. Укаларим хабар олиб туришди, лекин туғуруқхонада ёлғиз қолиб кетдим. Қандай исм қўйиш ҳақида маслаҳатлашиш учун яқинларимдан ҳеч ким йўқ эди. Ўзим унга Дунё деб исм қўйдим. Турмуш ўртоғимга қўнғироқ қилсам, болани тан олмади. Тушкунликка тушиб қолдим. Кредитлар ва уй-жой қилишим кераклиги сабаб моддий эҳтиёж устун келди. Менга 90 миллион сўм ваъда қилишди, жиноятни барибир жазоси бор экан — қўлга тушдим”.

— Кичкина қизимни охирги марта ухлаб ётганда кўрганман, йиғламасди, беозоргина қизча эди. Қолгани эсимда йўқ. Тергов жараёнида фақат расмини кўрдим, шифокорлар назоратида экан. Ҳозир катта қизимга амакимнинг оиласи қарайди. Биламан, онам ҳаёт бўлганида бундай қилишимга йўл қўймасди. Жазо муддатим тугагач албатта қизимни қайтариб оламан, иккисини ҳам ўзим катта қиламан. Аёллар фақат ўзининг кучига ишониши керак, йўлдан адашгандан кейин бари кеч бўлади, бу йиллар қайтиб келмайди, — дейди маҳкума.