Тошкент шаҳрида аёл ва унинг онаси янги туғилган чақалоғини танишлари орқали сотмоқчи бўлганда ушланди. Бу ҳақда Олий суд ахборот хизмати хабар қилди.
Маълум бўлишича, З.И. исмли қиз Фарғона водийсида яшовчи, тергов жараёнида аниқлашнинг имкони бўлмаган Ш. исмли шахс билан севишиб, мунтазам яқинликда бўлиб келган ва ҳомиладор бўлиб қолган. З. ҳомиласи катта бўлиб қолгани учун аборт йўли билан олдириш мумкин эмаслигини билиб, ота-онаси ва маҳалла олдида шарманда бўлишдан қўрққан ва туғиладиган фарзандидан қутилиш йўлларини қидирган. Шу орада ўзига илгари таниш бўлмаган М.А. исмли эркак билан танишиб қолиб, унга туғиладиган чақалоқни сотмоқчи эканини билдирган. Болани сотиш орқали мўмай даромадга эга бўлишни хоҳлаган М. таниши М.Н. исмли аёлга қўнғироқ қилиб, бир таниши яқин орада дунёга келтирадиган чақалоғини сотмоқчи бўлаётгани ва унга харидор топиб беришини сўраган.
Қайд этилишича, бу хабарни эшитган М. тегишли органга ариза билан мурожаат қилган. Бу орада З.И. ва М.А. М.Н.нинг уйига келиб, чақалоқ туғилиш муддати яқинлашаётгани, тезроқ харидор топиш лозимлигини айтган, М.Н. жиноятнинг бошқа иштирокчиларини аниқлаш мақсадида бу ҳақда яна кимлар билишини З.дан сўраган. У эса онасининг ҳам хабари бор эканини айтиб, телефон орқали иккисини гаплаштирган. Суҳбат давомида З.нинг онаси М.И. чақалоқни 3 минг долларга сотишини билдирган.
Кейинчалик М.А. ариза муаллифи М.Н.га қўнғироқ қилиб, чақалоқни олиш фикридан қайтган бўлса, бошқа мижозлари борлигини айтиб, огоҳлантирган. Аёл жиноятнинг олдини олиш мақсадида таниши Т.Н. исмли аёлни тадбирга жалб қилган. Т. савдони пишитиш мақсадида М.А. билан учрашганда у чақалоқни 7 минг долларга сотишини айтган.
Таъкидланишича, касалхонанинг туғруқ бўлимида З. чақалоқни туғиб, маълумотнома ва боланинг суратларини М.А.га берган. Эркак уни Telegram орқали Т.га жўнатиб, харажатлар кўпайиб кетгани учун чақалоқ нархи 8500 долларга кўтарилганини айтган. М.А. ва М.И. чақалоқни З.дан олиб, ўз хоҳиши билан бераётгани ва ҳеч кимга даъво қилмаслиги ҳақида тилхат ёздирган.
Улар Т.дан келишилган 8500 доллардан 8 минг долларини олаётган вақтда ҳуқуқ-тартибот ходимлари томонидан қўлга олинган. М.А., З.И. ва М.И. Жиноят кодексининг 135-моддаси (одам савдоси) 3-қисми «а» бандида назарда тутилган жиноятни содир этганликда айбдор деб топилган. М.А.га 5 йил 6 ой, З.И. ва М.И.га 3 йил 6 ой муддатга озодликдан маҳрум этиш жазоси тайинланган.
Изоҳ (0)