Тошкент вилоятида бир ёшли ўғлини 9 минг долларга сотмоқчи бўлган эр-хотинга ҳукм ўқилди. Бу ҳақда Тошкент шаҳар суди маълум қилди.
Маълум қилинишича, И.С. исмли фуқаро 2019 йил 17 июнь куни соат 14:00 ларда ўзининг шаръий никоҳида бўлган хотини Т.Г. билан олдиндан тил бириктириб, 2018 йил 26 октябрь куни туғилган ўғлини сотиб юбормоқчи бўлган.
Шу мақсадда Тошкент шаҳар Учтепа туманида жойлашган «Жиз-биз» деб номланган кафеда И.С. билан келишиб, ундан 9000 доллар олаётган вақтида ички ишлар ходимлари томонидан ашёвий далиллар билан қўлга олинган.
Эр-хотинга нисбатан Жиноят кодексининг 135-моддаси (одам савдоси) 3-қисми «а» банди бўйича жиноят иши очилган.
Аёлнинг сўзларига кўра, у турмуш ўртоғи билан ишсиз қолгани сабаб фарзандини парвариш қилишга қийналган. Шу сабабли улар боланинг келажаги учун бошқа оилага сотиб юборишга қарор қилган.
Суд ҳукмига кўра, она Жиноят кодексининг 135-моддаси 3-қисми «г» банди билан айбдор деб топилиб, 4 йилга; ота эса 5 йилга озодликдан маҳрум этилди. Жазони ўташ муддати 2021 йил 2 февралдан ҳисобланиши маълум қилинган.
Бундан аввал Тошкентда уч кунлик чақалоғини 9 минг долларга сотишга уринган аёлга суд ҳукми ўқилгани, Самарқандда аёл уй олиш учун 6 ёшли ўғлини 6 минг долларга сотмоқчи бўлганида қўлга олингани ҳамда Навоийда фарзандини 85 млн сўмга сотишга уринган эр-хотин жиноят устида қўлга олингани ҳақида хабар берилганди.
Изоҳ (0)