Қашқадарё вилояти Чироқчи туманида 10 киши икки ака-укани калтаклади. Бу ҳақда вилоят ИИБ хабар берди.
Маълум қилинишича, 14-февраль куни соат 19:30 ларда Чироқчи туманида содир бўлган. Шу туманда жойлашган “Шаржаҳ” спорт комплексида шуғулланувчи фуқаролар ўртасида ўзаро келишмовчилик оқибатида жанжал чиққан. Муқаддам судланган фуқаро Қ.О. тўққиз нафар шериклари билан ака-ука Ж.I. ва Ж.А.ни уриб тан жароҳати етказган.
Мазкур ҳолат юзасидан Чироқчи тумани ИИБ ҳузуридаги тергов бўлими томонидан Жиноят кодексининг 277-моддаси 2-қисмининг “а,б” бандлари билан жиноят иши қўзғатилиб, иштирокчиларнинг ўн нафарига нисбатан процессуал тартибда қамоқ эҳтиёт чораси қўлланилган.
Бундан аввал Фарғонада компьютер клубида жанжал кўтарган шахслар қамоққа олингани хабар қилинганди.
Ўзбекистонда 2024 йилда 469 568 киши маъмурий жавобгарликка тортилган. Кўрилган маъмурий ҳуқуқбузарлик тўғрисидаги ишларнинг аксариятини майда безорилик каби ҳуқуқбузарликлар бўлган. 2024 йилда жиноят ишлари бўйича судлар томонидан 77 995 нафар шахсга нисбатан 61 481 та жиноят иши кўриб чиқилган. Судланганлар сони 61 502 нафарни ташкил этиб, шундан 20 659 кишига озодликдан маҳрум қилиш ва 39 763 нафарига бошқа турдаги жазолар тайинланган, 1 080 нафар шахсга шартли ҳукм қилинган.
Изоҳ (0)