Ижтимоий тармоқларда қайнона-келин жанжали оқибатида гўдакка қайноқ сув тўкилгани ҳақида хабарлар таралди. Болалар омбудсмани ҳолат юзасидан маълумот берди.
Аниқланишича, воқеа 27 январь куни содир бўлган. Тошкент вилояти Тошкент туманида истиқомат қилувчи фуқаро Х.М. (1999 йилда туғилган аёл) қайнонаси М.Х (1966 йилда туғилган) билан оилавий ўзаро жанжал юзага келган. Аёл келинига қарата ичида иссиқ сув бўлган термосни отган. Оқибатда сув онанинг қўлида бўлган чақалоққа (23 кунлик) тўкилиб, оёқ ва қўл қисми куйган.
Болага зарурий тиббий муолажалар кўрсатилиши таъминланган. Ҳозирда туман ИИБ томонидан ҳолат юзасидан терговга қадар текширув олиб борилмоқда.
Шунингдек, ҳолат юзасидан низо давом этишининг олдини олиш мақсадида келинга бир ой муддатга ҳимоя ордери берилиб, қўйилган чекловлар оила аъзоларига тушунтирилган.
Блогер Ақидахонимнинг Faceбокъда ёзишича, қайнона термос билан келининг бошига урган. 29 январь куни аёл ва чақалоғи учун судмед экспертизага йўлланма берилиши керак. Қайнона эса жанжалдан икки кун ўтиб умрага кетган.
Аёл 35 ёшли турмуш ўртоғига чақалоқнинг куйган қўл-оёғи видеоларини ташлаб берганида у “Ҳа, яхши бўпти! Ўтиравер энди, болага ўзинг қараб”, деб айтган. Блогернинг сўзларига кўра, бу эркакнинг иккинчи турмуши. Биринчи турмушидан ҳам боласи бор, у собиқ келин ҳам ажрашиб қутилган.
Январь ойи бошларида Фарғонада 2 ёшли бола энага туфайли оғир жароҳат олганди. Ҳолат юзасидан жиноят иши қўзғатилган. 7 январь куни Тошкент вилоятида онаси томонидан калтакланган 4 ёшли қиз вафот этди. Ушбу ҳолат юзасидан ҳам жиноят иши қўзғатилиб, аёл қамоққа олинган.
Изоҳ (0)