Атир — аёл образининг бир қисми. У инсонларда нафақат кайфият, балки ўзига хос таассурот ҳам уйғотади. Аммо узоқ вақт танланган атирнинг ҳиди бор-йўғи бир неча дақиқада йўқолиб кетиши ҳолатлари ҳам кузатилади. Бу ҳафсалани пир қилади ҳамда атир сифати ёки танлов тўғрилигига шубҳа уйғотади.
Аслида эса, ҳиднинг узоқ сақланиши фақат парфюмнинг маркаси ёки нархига боғлиқ эмас. Бунда терининг ҳолати, фойдаланиш усули, ҳатто об-ҳаво ва тана ҳарорати каби омиллар муҳим рол ўйнайди. Қуйида атирнинг давомийлигига таъсир қиладиган тўртта асосий хатони таҳлил қиламиз.
- Қуруқ тери атирни ўзига сингдириб юборади
Терингиз қуруқ бўлса, атирнинг узоқ вақт таралиши ҳақида орзу ҳам қилманг. Чунки қуруқ терида ҳиднинг “ўрнашиб оладиган” қатлами бўлмайди, натижада атир дарров учиб кетади. Бу ҳолат худди пергамент қоғозга атир сепишга ўхшайди: у дарров йўқолади, ҳатто из ҳам қолмайди.
Бундай ҳолатда энг оддий ечим атир сепишдан аввал терига енгил, ҳидсиз намлантирувчи крем суртишдир. Бу терида ҳимоя қатлами ҳосил қилади ва атир томчилари шу қатламга ёпишиб, секин-аста тарала бошлайди. Айниқса, совуқ мавсумда бу усул яхши самара беради.
- Атирни ҳавога сепиш натижа бермайди
Баъзи одамлар атирни ҳавога сепиб, унинг майда томчилари остида қолишни ёқтиришади. Аслида бу усул фақат кўзни қувонтиради, лекин ҳидни ушлаб қолмайди. Ҳар қандай атир тери билан тўғридан тўғри алоқани талаб қилади, айниқса, қон юриши фаол бўлган нуқталарга сепиш мақсадга мувофиқ ҳисобланади: масалан, ўмров суяги, тирсак ичи, тизза каби жойларда.
Баъзан атир матода ҳам узоқ вақт сақланади, бунинг учун материал табиий бўлиши керак. Мода блогерлари парфюмни палтонинг ички томонига ёки шарфга сепишни тавсия қилишади. Бу усул ҳиднинг бир неча соат эмас, балки кун давомида ҳам сезилиб туришига ёрдам беради.
- Атир ва туалет суви фарқини билинг
Туалет суви (eau de toilette) таркибида ифор берувчи модда камроқ — тахминан 5–15% бўлади. Агар атир иси сиз билан бутун кун давомида қолишини истасангиз, флаконда EDP (eau de parfum) ёки эхтраит де парфум ёзуви бор атирни изланг. Бундай атирлар ифори чуқурроқ, бойроқ бўлади ва терида узоқ вақт сақланади.
- Тана ҳарорати, иссиқ об-ҳаво ва жисмоний фаоллик таъсир қилади
Энг узоқ вақтга етадиган атир ҳам, агар сиз жисмонан фаол бўлсангиз ёки ташқарида ҳаво жуда иссиқ бўлса, тез буғланади. Чунки тана ҳарорати ошганда атир молекулалари қисқа вақтда учиб кетади. Шу сабабли бир хил брендга тегишли парфюм ёзда бошқача, қишда эса бутунлай бошқа тарзда ифор беради.
Изоҳ (0)