Қашқадарё вилоятидаги XV асрга оид “Лангар ота” масжиди АҚШ гранти кўмагида реставрация қилинди. Бу ҳақда Маданий мерос агентлиги хабар берди.
Унга кўра, 4 июнь куни Қашқадарё вилоятининг Қамаши туманида жойлашган XV асрга оид “Лангар ота” масжидининг қайта тиклашдан кейинги илк очилиш маросими бўлиб ўтди. Унда Маданий мерос агентлиги директори Баҳодир Абдукаримов, АҚШнинг Ўзбекистондаги фавқулодда ва мухтор элчиси Жонатан Ҳеник, вилоятнинг қатор мутасадди раҳбарлари, оммавий ахборот воситалари ва маҳалла фаоллари иштирок этишди.
Мамлакатнинг маданияти ва эътиқоди сарчашмаларига мансуб ёдгорликларидан бири ҳисобланган тарихий “Лангар ота” масжиди АҚШ Элчилари маданий мерос муҳофазаси жамғармаси (AFCP) томонидан ажратилган 250 минг АҚШ долларга тенг таъмирлаш лойиҳаси натижасида қайта тикланди ва фойдаланишга топширилди.
“Маданий мерос объектларини қайта тиклаш ва асраб-авайлаш борасида АҚШ ҳукумати ва элчи жаноблари билан ҳамкорликда қатор хайрли ишларни амалга ошириб келмоқдамиз. Бундан ташқари, бир неча йиллардан бери уста реставраторларнинг билим ва кўникмаларини ошириш бўйича ҳамкорликда қатор амалий маҳорат дарслари ҳам ташкил этилди. Иккала мамлакат ўртасидаги маданий меросни ҳимоя қилиш йўналишидаги ҳамкорлик муносабатларини келгусида ҳам янада мустаҳкамлаган ҳолда ривожлантириб борамиз”, дея таъкидлади Маданий мерос агентлиги директори Баҳодир Абдукаримов ўз нутқида.
Қайд этилишича, 2023 йилнинг куз ойларида бошланган реставрация лойиҳаси мажмуанинг кошинларини аслидай янгилаш ва масжиднинг нураб қолган том қисмини ўзгартириш ишларини ўз ичига олди. Шунингдек, америкалик дипломат ўз баёнотида Ўзбекистоннинг ажойиб ва бетакрор маданий меросини асраб-авайлашга ўз ҳиссасини қўшиш имкониятига эга бўлганидан мамнун эканини қайд этди.
Маълумот учун, АҚШ Элчилари маданий мерос муҳофазаси жамғармаси 2001 йилда АҚШ Конгресси томонидан таъсис этилган. АҚШ давлат департаменти томонидан бошқариладиган AFCP жамғармаси бутун дунё бўйлаб тарихий объектлар, қўлёзмалар ва маданий анъаналарни сақлашни қўллаб-қувватлаб келади. Ўзбекистонда АҚШ ҳукумати ҳозиргача умумий қиймати 2,5 миллион АҚШ долларга тенг бўлган 15 та лойиҳани молиялаштирган.
2025 йилнинг март ойида Самарқанд вилоятидаги ХIX-ХХ асрларга оид 3 та тарихий масжид бинолари бузиб ташлангани аниқланганди. Прокуратура органлари томонидан Маданий мерос агентлиги билан ҳамкорликда ўтказилган назорат тадбирлари давомида 3 та тарихий масжид бинолари бузиб ташланганидан ташқари, яна бир масжид тегишли рухсатсиз таъмирлангани оқибатида ёдгорликларга жами 46,8 миллиард сўмлик зарар етказилган.
Изоҳ (0)