Ҳиндистоннинг Нагпур шаҳрида IndiGo авиакомпаниясига тегишли самолёт бортда бомба борлиги ҳақидаги таҳдид сабабли фавқулодда қўндирилди. Бу ҳақда India Today хабар берди.
Маълум қилинишича, учоқ Кочи шаҳридан пойтахт Нью Деҳлига парвоз қилаётган бўлган. Йўловчилар фавқулодда қўнишдан кейин эвакуация қилинган. Самолёт текширувдан ўтказилган, бироқ шубҳали буюмлар аниқланмаган. Ҳозирда бомба ҳақидаги маълумот манбаси ва таҳдиднинг ишончлилиги бўйича тергов олиб борилмоқда.
12 июнь куни Ҳиндистонда Air India авиакомпаниясининг Boeing 787-8 Dreamliner йўловчи самолёти ҳалокатга учраганди. Аҳмадободдан учиб, Лондонга йўл олган самолёт бир неча дақиқа ўтиб, шаҳардаги турар жой биносига қулаб тушган. Оқибатда самолёт бортида бўлганларнинг 241 нафари ҳалок бўлган, бир нафар йўловчи омон қолган.
Қуруқликда эса 30 дан ортиқ одам, жумладан, самолёт қулаган тиббиёт коллежи кампусида яшовчи ўн нафар шифокор ва уларнинг оила аъзолари ҳалок бўлган. Қурбонларнинг умумий сони 274 тани ташкил қилмоқда. Ҳиндистон учун бу сўнгги ўн йилликлардаги энг йирик авиаҳалокатга айланган.
Изоҳ (0)