AZUR air авиакомпанияси Тошкентга фавқулодда қўнишга мажбур бўлган Boeing 767-300 самолёти юзасидан баёнот берди. Бу ҳақда «Рамблер.Путешествия» хабар бермоқда.
26 февраль, жума куни маҳаллий вақт билан 5:38 да бортида 327 йўловчи ва 9 нафар экипаж аъзоси бўлган AZUR air’нинг Boeing 767-300 лайнери Тошкент аэропортига фавқулодда қўнди. Самолёт Москвадан Таиланднинг Пхукет курортига учаётган эди.
«Кема ҳужжатларига мувофиқ, учувчилар мазкур турдаги ҳаво кемаларини қабул қилишга қодир бўлган энг яқин аэропортга самолётни қўндириш ҳақида тўғри қарор қабул қилган. Қўниш одатдаги тартибда амалга оширилган», — деди AZUR air’нинг жамоатчилик билан алоқалар бўйича директори Анастасия Матюшина «Рамблер.Путешествия» порталига берган интервьюсида.
Унинг сўзларига кўра, ҳозирда Тошкентда турган йўловчилар иккита захира самолёти етиб келишини кутмоқда. Йўловчиларга ичимликлар ва овқат берилмоқда.
«Бизнинг иккита Boeing 757-200 самолётимиз Тошкентга йўл олиб, у ердан йўловчиларни ҳордиқ жойига етказиш учун парвоз қилишга тайёр турибди. Ҳозирги вақтда биз мазкур самолётларнинг учиб ўтиши учун Пхукетгача бўлган йўналишда жойлашган Ҳиндистон, Покистон ва бошқа мамлакатларнинг авиация маъмуриятларидан рухсат берилишини кутмоқдамиз», — деди Матюшина.
AZUR air самолётининг Тошкентга фавқулодда қўниши юзасидан Россия Тергов қўмитаси текширув ишларини бошлаган. Самолёт мажбурий қўнишни амалга оширишига двигателдаги мойнинг паст даражаси датчиги ишлаб кетгани сабаб бўлган. Ҳозирча AZUR air техник ёрдам сўраб «Ўзбекистон ҳаво йўллари»га мурожаат қилмаган.
AZUR air авиакомпанияси 2014 йилга қадар «Катекавиа» деб номланган ва 2015 йил мартигача UTair’нинг шуъбаси эди. Мазкур авиаташувчи парвозларни икки хил — Boeing-757 ва Boeing-767 самолётларида амалга оширади. Авиакомпания паркида 14 самолёт бор, у Таиланд, Испания, Исроил, Доминиканага чартер рейслар амалга оширишга ихтисослашган.
Изоҳ (0)