Путин Киевни 3-4 кун ичида эгаллашни режалаштирган. Washington Post Путиннинг Украинадаги режаларини фош қилди

АҚШ президенти Жо Байден, шунингдек, Американинг сиёсий ва ҳарбий раҳбарияти бир неча ой олдиндан Россия президентининг Украинага ҳужум қилиш режаларидан бохабар бўлган ва ўзларида бор маълумотни Киев ва Москвага етказиш орқали ушбу хатти-ҳаракатлар олдини олишга уринган. Бу ҳақда Washington Post АҚШ, Европа, НАТО ва Украина юқори мансабли шахслари орасидаги 30 дан ортиқ манбаларига таяниб хабар берди.

Нашр маълумотларига кўра, 2021 йил октябрида Овал кабинетда президент Байден, вице-президент Камала Харрис, давлат котиби Энтони Блинкен, мудофаа вазири Остин Ллойд, АҚШ армияси генерали Марк Милли ва бошқалар иштирокида учрашув бўлиб ўтган.

Унда Байденга сунъий йўлдошдан олинган тасвирлар, тутиб олинган маълумотлар ва манбалардан олинган ахборот асосида тузилган, Путиннинг Украинага катта кўламдаги ҳужум режалари ҳақидаги махфий разведка маълумотлари тақдим этилган.

Бир неча ойлар давомида АҚШ разведкаси Россия армиясининг Украина чегараси бўйлаб жойлашаётганини кузатиб турган. Байденга Москва катта кўламли ҳужумга тайёрлигини маълум қилишган.

«Америка расмий шахслари сўзларига кўра, АҚШ разведка ҳамжамияти Россия сиёсий раҳбарияти, жосуслик аппарати ва қуролли кучларининг кўплаб бўғинларига кириб борган», — дейилади нашр хабарида.

Маърузани тинглагач, Байден Путинни тийиб туриш ёки унга қарши чиқишга қатъий бел боғлаган. Аммо НАТО аъзоларининг барчаси ҳам АҚШ билан ҳамжиҳатлигини билдирмаган, чунки Ироқ, Афғонистондан қўшинларнинг олиб кетилиши ва Дональд Трамп президентлигидан кейин Америка президенти «босқинчи Россияга қарши Ғарбнинг жавобига самарали раҳбарлик қила олиши»га шубҳалар бор эди.

Маъруза чоғида Марк Милли Россия бир нечта йўналишларда ҳужум бошлашни режалаштираётганини маълум қилди.

Хусусан:

• Киевга Чернигов ва Чернобиль томондан ҳужум қилиниши керак эди (қиш об-ҳавоси танкларнинг ҳаракатланишига имконият яратиши керак эди);
• 3—4 кун ичида Россия махсус топшириқли бўлинмалари Зеленскийни топиб, зарур бўлса, ўлдириб, ҳокимиятдан тушириши ва қўғирчоқ ҳокимият ўрнатиши керак эди;
• бир неча ҳафталар ичида қўшинларнинг бошқа гуруҳи Днепр жануби ва чап соҳилларини эгаллаб, сўнг ғарбга қараб йўл олиши керак эди.

Мажлисдан кейин Байден иккита қарор қабул қилган: Россия раҳбариятини эҳтимолий ҳужум оқибатлари ҳақида огоҳлантириш учун Москвага кимнидир юбориш, шунингдек, иттифоқдошларни Россия билан боғлиқ масалада ягона позицияда туриш зарурлиги ҳақида хабардор қилиш.

Washington Post эслатишича, Оқ уй разведка маълумотларини Киевга узатган, бироқ у ерда Россия ҳужуми ҳақидаги ахборотга шубҳа билан қарашган.