Сурия муваққат президенти Аҳмад аш-Шараъа Исроилнинг мамлакатга ҳужумлари фонида халққа мурожаат қилди. Сиёсатчи друзларни ҳимоя қилиш Сурия учун миллий устувор вазифа эканини айтди. Бу ҳақда Al Mayadeen хабар берди.
Сиёсатчи ўз мурожаатида асосан друзлар истиқомат қилувчи Сувайда вилоятидаги тартибсизликларга тўхталди. Аш-Шараъа “узоқ тарихга эга бўлган сурияликлар ҳар доим бўлинишнинг ҳар қандай шаклини рад этиб келганини” таъкидлади.
Сурия халқи Исроилнинг бизни парчалашга уринишларини енгишга энг қодир куч, деди президент.
У Сурия ташқи кучлар сиёсатини синаш майдони эмаслигини айтиб, мамлакатни қайта қуриш ва миллий бирлик атрофида жипслашиш учун умумхалқ саъй-ҳаракатларини амалга оширишга чақирди.
Янги Сурияни барпо этиш биздан ватанимиз ёнида мустаҳкам туришни талаб қилади, деди у.
Друзларни ҳимоя қилиш устувор вазифа
Аш-Шараъа Суриядаги друзлар жамоасининг аҳамиятини эътироф этиб, уларни “миллий бирликнинг ажралмас қисми” деб атади. Сиёсатчи уларни ҳимоя қилиш “энг устувор вазифа” эканини таъкидлади. У Сувайдада юз берган бир неча кунлик қонли тўқнашувлардан сўнг тартибни тиклаш вазифасини маҳаллий гуруҳлар ва друз диний етакчиларига топширишга қарор қилганини айтди.
Исроил билан уруш қилиш ёки друз оқсоқолларига келишув тузишга рухсат бериш танловига дуч келдик ва ватанни ҳимоя қилишни афзал билдик, деди у.
Президент Исроилни аввалги тузум қулаганидан бери Сурияни жанг майдонига айлантириш ва мамлакатнинг ижтимоий бирлигини бузишга уринишда айблади.
Бизнинг юртимизда ўзгаларнинг мақсадларига ўрин йўқ. Биз Суриянинг қадр-қимматини тиклаймиз ва миллий манфаатни ҳамма нарсадан устун қўйишимиз лозим, дея таъкидлади Аш-Шараъа.
Аш-Шараъа Сурия давлат муассасалари Сувайдадаги ички можаросини тўхтатишга аралашганини ва бу орқали хавфсизликни тиклашга эришилганини таъкидлади. Унга кўра, Исроил бу саъй-ҳаракатларни бузишга ҳаракат қилган, бироқ “фақат халқаро воситачилар — АҚШ, араб ва турк томонларнинг саъй-ҳаракатлари — вазиятни янада кескинлашувдан сақлаб қолган”.
Суриядаги вазият
Сурияда друзлар ва араб қабилалари ўртасида қуролли тўқнашувлар юз берган эди. Можаро бадавийларга тегишли машиналар тортиб олиниши билан бошланган. Тўқнашувлар оқибатида камида 30 киши ҳалок бўлган, 100 дан ортиғи яраланган.
Сурия Мудофаа ва Ички ишлар вазирликлари вазиятни бостириш учун Сувайдага қўшимча кучларни юборган. Бироқ уларнинг ҳарбий колонналари ҳужумга учраган. Оқибатда 18 аскар ҳалок бўлган, 9 нафари асирга олинган.
Шундан сўнг Исроил друзларни ҳимоя қилиш даъвоси билан Сурия армияси ва Мудофаа вазирлигига қарашли бир нечта объектга зарбалар берган. Жумладан, Дамашқдаги Сурия бош штаби ҳужумга учраган, президент саройининг атрофи нишонга олинган. Томонлар 16 июль куни кечқурун ўт очишни тўхтатиш бўйича келишувга эришган. Бунга АҚШ, араб давлатлари ва Туркия ташаббус кўрсатгани маълум қилинган.
Изоҳ (0)