АҚШ президенти Дональд Трамп собиқ президент Жо Байденнинг соғлиғи, шунингдек, унинг ёрдамчилари томонидан президент имзосидан фойдаланиши билан боғлиқ терговни бошлашга кўрсатма берди. Бу ҳақда Оқ уй томонидан эълон қилинган меморандумда маълум қилинган.
“Сўнгги ойларда собиқ президент ёрдамчилари Байденнинг ақлий қобилияти пасайганини яшириш учун автоимзодан фойдаланиб, президент имзоларининг аҳамиятини суиистеъмол қилгани тобора аниқ бўлиб бормоқда”, дейилади ҳужжатда.
Меморандумда таъкидланишича, Байденнинг имзоси кескин сиёсий ўзгаришларни амалга ошириш учун “минглаб ҳужжатларда ишлатилган” бўлса-да, ижро ҳокимияти аслида кимга тегишли эканини Америка жамоатчилигидан атайлаб яширган бўлишлари мумкин.
Ҳужжатда қайд этилишича, Байденнинг аксарият фармонлари президентнинг ўз қўли билан эмас, балки автоимзо ёрдамида имзоланган. Бу айниқса унинг президентлик муддатининг иккинчи ярмида қабул қилинган фармонларга хос бўлиб, бу даврда унинг когнитив бузилишлари “у билан ишлаганлар учун янада яққолроқ кўринган.
Таъкидланишича, бош прокурор Оқ уйнинг юридик маслаҳатчиси билан биргаликда текширув ўтказиб, автоимзони қўллаш тўғрисидаги буйруқни ким берганини, шунингдек, айнан қайси ҳужжатлар, жумладан, афв этиш тўғрисидаги фармонлар ва ижро фармонлари шу тарзда имзоланганини аниқлайди.
20 май куни Трамп Байден ҳокимиятда бўлганида расмий ҳужжатларни ўзи имзоламаганини маълум қилганди. АҚШ президентининг фикрича, Байден даврида ҳақиқий бошқарувни давлат раҳбарининг автоматик имзосидан фойдаланиш ҳуқуқига эга бўлган “радикал сўл телбалари” амалга оширган.
АҚШнинг амалдаги президенти Дональд Трамп Байденнинг автоимзо билан боғлиқ можаросини АҚШ тарихидаги энг йирик можаролардан бири деб атади. Унинг фикрича, Байден маъмурияти томонидан автоимзо билан имзоланган афвлар ҳақиқий эмас.
Республикачиларга яқин бўлган New York Post газетасининг аввалроқ Оқ уйнинг икки собиқ ходимига таяниб, Байденнинг асосий ёрдамчиларидан бири расмий ҳужжатларни имзолаш учун автоимзодан фойдаланиб, ўз ваколатларини ошириб юборган бўлиши мумкинлигини ёзган эди.
Май ойи охирида Конгресс Вакиллар палатасининг Назорат ва ҳукумат ислоҳоти қўмитаси раиси, республикачи Жеймс Komer Fox News эфирида Байден номидан ҳужжатларга автоимзо ёрдамида имзо қўйган Оқ уйнинг тўрт нафар ходими шахси аниқланганини маълум қилди.
Изоҳ (0)