Халқ орасида “уйдаги ўргимчакни ўлдириш фалокатга олиб келади” каби турли иримлар мавжуд. Гарчи илм-фан ушбу эътиқодни рад этмаса-да, ўргимчакни ўлдирмасликнинг анча асосли, илмий сабабларини келтиради. Энтомологлар бу нафақат ўргимчакнинг фойдали мавжудот эканлиги, балки у билан боғлиқ нохуш оқибатларнинг олдини олиш учун ҳам муҳимлигини таъкидлайди.
Масалан, бутли ўргимчак деб аталувчи тур ўзининг қўрқинчли кўринишига қарамай, инсон учун зарарсиз. Агар сиз тасодифан урғочисини ўлдирсангиз, унинг елкасида турган ўнлаб личинкалари турли томонга сочилиб кетади. Натижада уйдаги битта ўргимчак ўрнига “ўргимчаклар эпидемияси”га дуч келишингиз мумкин.
Бундан ташқари, ўргимчакни полда ёки деворда турган ҳолатида эзиб юборсангиз, у ўзида олиб юрган овқат қолдиқлари ва бактерияларни ташлаб кетади. Баъзи ҳолларда бу бактериялар одамда аллергик реакцияни қўзғатади.
Аксарият уйларда учрайдиган ўргимчаклар безарар бўлади. Уларни кўришимиз биланоқ хоналарни тозалашга тушишимиз табиий, лекин уйда 1-2 та ўргимчаклар яшаса, бу зарар қилмайди, чунки улар майда зараркунандаларни тутиб, уйни муҳофаза қилишга ёрдам беради.
Бундан ташқари, ўргимчаклар боғ ва ҳовлида ҳам ёрдамчи ҳисобланади: ўргимчаклар кана, ғумбак ва ўсимликларга зарар етказувчи турли ҳашаротларни еб, гуллар ва баргларни асрайди.
Агар сиз уйингизда ўргимчак пайдо бўлишини истамасангиз, хонадонда доимий чангларни артиш, уйни озода сақлаш ва мебеллар орқасини мунтазам тозалаб туриш кифоя қилади.
Изоҳ (0)