Парвоз пайтида бизга овқат ва ичимликлар таклиф қиладиган стюардессаларнинг ўзлари кўпинча уларни истеъмол қилмайди. Бунинг сабаби уларнинг соғлиққа таъсири ва хавфсизлиги билан боғлиқ. Қуйида стюардессалар самолётда одатда қандай таомлардан ўзини тийиши ва бунга нима сабаб бўлиши ҳақида маълумот берамиз.
Чой ва қаҳва
Бу ичимликлар учун сув кўпинча самолётдаги махсус сув идишларидан олинади. Бу сув ичиш учун эмас, техник эҳтиёжлар учун мўлжалланган бўлиши мумкин. Қувурлар қачон тозалангани номаълум бўлади, шунинг учун стюардессалар бу ичимликлардан воз кечади ва йўловчиларга ҳам тавсия этмайди.
Бундан ташқари, кофеин танани сувсизлантиради, самолётдаги қуруқ ҳаво эса бу ҳолатни янада кучайтиради.
Спиртли ичимликлар
Самолётда босим пасаяди ва ҳавода кислород камаяди. Шунинг учун оддий бир бокал вино ҳам ерда ичилгандек эмас, балки кучлироқ таъсир қилади. Бунда бош айланиши, ҳолсизлик ва ноқулайликлар юзага келиши мумкин.
Газаклар
Пишлоқ, крекер, ёнғоқ каби енгил тамаддилар таркибида кўп туз ва консервант бўлади. Бу моддалар самолётдаги қуруқ ҳавода танани янада сувсизлантиради. Ҳаракатсизлик ва етарли суюқлик ичилмаслиги “саёҳатчи қабзияти” — ич қотиш муаммосини келтириб чиқаради.
Иссиқ овқат
Самолётдаги ошхона ускуналари овқатни яхши қиздира олмайди. Айниқса гўштли таомлар ичидан яхши пишмаслиги мумкин. Шу боис стюардессалар иссиқ овқатдан воз кечади ва парвоздан кейин таомланишни афзал кўришади.
Унда самолётда нима ейиш мумкин?
Кўпчилик стюардессалар парвоздан олдин овқатланиб, самолётда фақат сув ичишни маъқул кўради. Агар учиш вақтида овқатланишга тўғри келса, янги мева ва сабзавотлар, ёғсиз оқсил манбалари (масалан, товуқ гўшти), тузсиз ёнғоқлар тавсия қилинади. Ичимлик сифатида эса кокос суви яхши танлов, чунки у организмни сувсизланишдан ҳимоя қилади.
Изоҳ (0)