Ҳеч ким уйга бемаза тарвуз ёки қулупнай олиб келишни хоҳламайди. Алданиб қолмаслик учун мақоладаги оддий қоидаларга амал қилиб кўринг. Улар сизга энг янги ва сифатли мева ҳамда резаворларни танлашда ёрдам беради.
Тарвуз танлашнинг оддий, аммо самарали усуллари
Тарвузни уриб кўришнинг фойдаси йўқ — ахир ҳамма ҳам пишган ва пишмаган тарвуз товушини фарқлай олмайди. Энг пишган тарвузни топиш учун эса ижтимоий тармоқларда машҳур бўлган оддий усулдан фойдаланинг. Икки қалин-яшил чизиқ орасига иккита бармоғингизни тутинг. Агар чизиқлар оралиғи бармоқ кенглигига тенг бўлса — сиз тўғри тарвузни топдингиз.
Тарвузнинг ерга тегиб турган жойига ҳам қаранг — бу одатда сариқ ёки оч жигарранг доғ бўлади. Агар бу доғ ранги тўқ ва тиниқ бўлса, демак, тарвуз узоқроқ етилган ва эҳтимол, янада ширин ҳамда хушбўй бўлади.
Яна бир муҳим белгиси пўстининг силлиқ эмас, балки хира (матт) бўлишидир. Сўнгги маслаҳат: тарвуз қанчалик оғир бўлса, шунчалик сувли бўлади.
Шафтоли танлашда “яшил новда” қоидасидан фойдаланинг
Ташқаридан пишган кўринган шафтоли аслида бемаза ёки “пахтадек” қуриб қолган бўлиши мумкин. Шунинг учун тажрибали деҳқонлар тавсия қиладиган оддий “яшил новда” қоидасига амал қилинг.
Шафтолининг новдага бириккан қисмига — бандининг изига қаранг. Агар бу жой яшил рангда бўлса, шафтоли дарахтдан эрта узилган ва ҳали тўлиқ пишмаган бўлади. Аксинча, агар из тўқ жигарранг (қорамтир) бўлса, бу шафтоли тўлиқ етилган, ширин ва ширали бўлиши эҳтимоли юқори.
Голубикани сувга солиб кўринг
Ижтимоий тармоқларда машҳур бўлган оддий усул ширин ва нордон голубикани ажратишга ёрдам беради. Бунинг учун резаворларни сув тўлдирилган идишга солинг. Агар мевалар сув юзасига чиқса — улар нордон, агар тубига чўкиб кетса — ширин. Сабаби пишган ва ширин меваларда шакар миқдори юқори бўлади, бу эса уларнинг оғирроқ бўлишига олиб келади.
Қулупнайни ёмғирли ҳавода харид қилманг
Ёмғирли об-ҳаво қулупнай сифати учун хавфли. Чунки юпқа пўсти намликдан ҳимоялай олмайди ва натижада резавор тезда чирий бошлайди. Шунинг учун қулупнайни қуёшли ва қуруқ кунда сотиб олиш тавсия этилади. Бу мева ёмғирда терилмаганига кафолат бўла олади.
Қулупнайни чиндан ҳам пишганлигини билиш учун унинг яшил “шапкасини” кўтариб қаранг. Агар унинг ости тўқ қизил рангда бўлса бу мева ширин бўлади. Шакли ва ҳажмига эса эътибор бермасангиз ҳам бўлади. Кичик қулупнайлар кўпинча катталарига қараганда ширалироқ бўлади.
Олма танлашда эътибор беринг
Мутахассислар олмани харид қилишдан олдин унга енгилгина бармоқ билан чертишни тавсия қилишади. Агар товуши қуруқ дарахтга ўхшаган тарзда чиқса — демак, олма пишган бўлади. Агар товуш хира ва бўғиқ бўлса, у ҳолда мева, эҳтимол, бемаза чиқади.
Яна бир белги олманинг оғирлигига эътибор беринг. Агар у қўлингизда оғирроқ туюлса, бу сувли ва ширали олма бўлишидан дарак беради.
Узумнинг бандига қаранг
Узум танлаётганда фақат доналарини эмас, балки новдасини (бандини) ҳам текширинг. Агар поя қорамтир ёки жигарранг бўлса, демак, узум бир неча кун олдин терилган ва эҳтимол, унчалик мазали эмас.
Энг яхши узумнинг новдаси ёрқин яшил бўлади ва букилганда дарров синмайди. Бу унинг янги, ширали ва пишганидан далолат беради.
Лимон ва цитрус меваларни қўлда солиштириб кўринг
Грэйпфрут, лимон ёки апелсин сотиб олаётганда бир нечта меванинг вазнини қўлда солиштириб кўринг — оғирроғи одатда энг ширин ва ширали бўлади.
Бундан ташқари, улар қаттиқ ва бир оз эластик бўлиши керак — худди яхши пуфланган шарчага ўхшаб. Бу эса меванинг идеал пишганлик даражасини билдиради.
Мангони тўғри танлаш
Манго ранги кўпроқ унинг тури ҳақида маълумот беради, пишган ёки пишмаганини эмас. Пишган манго бир оз қаттиқ, аммо бир оз юмшоқ ва эластик бўлади — худди шафтоли каби, озгина босилса эзилади. Агар манго тошдек қаттиқ бўлса, у ҳали пишмаган, аксинча жуда юмшоқ бўлса пишиб ўтиб кетган бўлади.
Энг муҳими мангонинг ҳиди ҳисобланади. Баъзан пишган манго ширин ва ёпишқоқ суви билан ажралиб туради, бу ҳам уни яхши пишганидан далолат.
Қайси мевалар терилгандан кейин пишади, қайсилари эса йўқ?
Баъзи меваларни бир оз пишмаган ҳолда харид қилиб, уйда узоқроқ сақлашингиз мумкин. Аммо баъзилари фақат пишган ҳолатда олиниши керак, акс ҳолда улар ёмон бўлиб қолади.
Терилгандан кейин ҳам пишиб етиладиган меваларга ўрик, шафтоли, нектарин, олхўри, банан, киви, манго, авокадо ва нок киради.
Олма, узум, гилос, ананас, тарвуз, қулупнай ҳамда цитрус мевалар эса терилгандан кейин яна пишмайди — уларни фақат пишганини харид қилиш керак.
Изоҳ (0)