Бақлажон кўплаб миллий ва замонавий таомларнинг таркибий қисми ҳисобланади. Аммо нотўғри танланган ёки етиштирилган бақлажон тахир таъми билан бутун таомнинг сифатига путур етказиши мумкин. Қуйида ушбу сабзавотнинг аччиқлик сабаби ва ундан қандай халос бўлиш мумкинлиги ҳақида сўз юритамиз.
Нега баъзи бақлажонлар таъми тахир бўлади?
Бақлажоннинг бундай ёқимсиз таъми соланин номли модда билан боғлиқ. У итузумдошлар оиласига кирувчи сабзавотларда, жумладан пишмаган помидор, қалампир, янги чиққан картошка, қалампир ва айниқса бақлажонларда учрайди. Бақлажонларда соланин моддаси кўпроқ нотўғри парваришлаш — масалан, етарли суғормаслик, иссиқхонанинг ҳаддан ташқари қизиб кетиши ёки азотли ўғитларнинг ортиқча миқдорда берилиши сабабли тўпланади.
Соланин инсон саломатлиги учун хавфли бўлиши мумкин, у ҳатто заҳарланишга ҳам олиб келади. Айниқса, ҳали тўлиқ пишмаган бақлажонларда бу модда кўп бўлади. Бироқ бақлажоннинг пишган-пишмаганини ташқи кўринишига қараб аниқлаш ҳар доим ҳам осон эмас. Шу боис, сабзавотнинг ички қисмидан озгина татиб кўриш тавсия этилади.
Сифатли бақлажонни танлаш қоидалари
Дўконда ёки бозорда бақлажон танлаётганда майда ёки ўртача катталикдаги, силлиқ, қалин пўстлоқли ва бир хил рангдаги сабзавотларга аҳамият беринг. Бундай бақлажонлар йирик ва юмшоқ бўлганларига қараганда мазалироқ бўлади. Ўз боғингизда етиштираётган бўлсангиз, бақлажонлар ҳаддан ортиқ ўсиб кетмасидан аввал уларни териб олишга ҳаракат қилинг. Шунингдек, оқ пўстлоғли навлар деярли ҳеч қачон тахир таъмга эга бўлмайди.
Агар сиз тахир бақлажонни сотиб олган ёки етиштирган бўлсангиз, уни дарров ташлаб юборманг. Қуйидаги осон усуллар билан соланиндан халос бўлиш мумкин.
Туз ёрдамида аччиқликни кетказиш
Бу усул сабзавотнинг шаклини сақлаб қолади ва уни кейинчалик бўлаклаш, майдалаш ёки бутун ҳолда пиширишга имкон беради.
Бақлажонни ювинг, қуритинг ва бандини кесиб ташланг.
Уни узунига иккига бўлинг.
Ички қисмига йирик туз сепинг. Майда туз ишлатиш тавсия этилмайди, чунки у эриб, сингиб кетади ва бақлажонни ҳаддан ортиқ шўр қилиб юборади.
Бақлажонни хона ҳароратида 25–30 дақиқа қолдиринг, у шарбат ажрата бошлайди.
Сўнг сувда яхшилаб ювиб ташланг ва керакли таомни тайёрлашга киришинг.
Тузли эритмада аччиқликни йўқотиш
Агар бақлажонни рулет ёки салат учун бўлакчаларга кесиш керак бўлса, бу усул айни муддао.
Бақлажонни ювинг, бандини олиб ташланг.
Уни думалоқ ёки узун бўлакларга кесинг (1–2 см қалинликда). Рагу ёки салат учун кубик шаклида ҳам тўғраш мумкин.
3. Чуқур идишга сув қуйинг, туз солинг ва эригунча аралаштиринг.
4. Бақлажон бўлакларини эритмага солинг.
5. Устига ликопча билан ёпинг ва унинг устидан оғир буюм қўйинг. Бу усул барча бақлажон бўлаклари сувга ботишига ёрдам беради.
6. 20–30 дақиқадан сўнг бақлажонларни сувда чайиб, пиширишга ўтинг.
Музлатиш орқали аччиқликни камайтириш
Бу усул кўпроқ вақт талаб қилади. Музлаб, сўнг эриган бақлажон юмшоқроқ бўлади, шунинг учун пишириш (айниқса қовуриш) вақтини қисқартиради.
Бақлажонни ювинг, қуритинг, бандини олиб ташланг.
Уни исталган шаклда кесинг.
Бўлакларни бир қатламда тахтача ёки ликопга жойлаб, музлаткичга 4 соатга қўйинг.
Музи эригач, сабзавот янада хуштаъм ва анча юмшоқ бўлади. Энди уни пиширишга киришишингиз мумкин.
Изоҳ (0)