Юқори қон босими, яъни гипертония даволанмаса инсульт, юрак хуружи ёки буйрак касалликлари каби жиддий муаммоларга олиб келиши мумкин. Шунинг учун агар тонометрда 140/90 миллиметр кўрсатилса, шифокорга мурожаат қилиш муҳим. У сизга дори-дармонларни тавсия қилиши ва ҳаёт тарзини ўзгартириш бўйича маслаҳатлар бериши мумкин. Бунинг билан бирга, қон босимини туширишга ёрдам берадиган бир неча ичимликларни ҳам синаб кўришингиз мумкин. Улар анъанавий даволаш ўрнини босмайди, балки унга ёрдам беради.
Кўк ёки қора чой
Тадқиқотларга кўра, уч ой ва ундан кўпроқ вақт давомида чой ичган инсонларда қон босими тушади. Кўк чойнинг таъсири қора чойга қараганда кучлироқ. Шунинг учун кунига бир стакан чой ичиш қон босимини барқарорлаштиришга ёрдам беради.
Қизил карам шарбати
Қизил карам шарбати таркибидаги нитратлар организмда азот оксидига айланиб, қон томирларини кенгайтиради. Бу юракнинг қон айланиши учун кўпроқ куч сарфлашини камайтириб, босимни пасайтиради.
Помидор шарбати
Япон олимларининг кўп йиллик тадқиқотига кўра, ҳар куни тузсиз помидор шарбати ичиш қон босимини ва “ёмон” холестерин даражасини пасайтиради. Тузсиз шарбатни танланг, чунки туз босимни кўтариши мумкин.
Анор шарбати
Мета-тадқиқотлар шуни кўрсатдики, мунтазам анор шарбатини ичиш қон босимини камайтиришга ёрдам беради, аммо таъсири тахминан икки ой давом этади. Шарбатни танлашда шакар ёки бошқа қўшимчаларсиз маҳсулотга эътибор беринг.
Мевали шарбатлар
Гилос шарбати қон босимини туширишда ёрдам беради, лекин ундаги шакар миқдорига эътибор беринг. Шарбат ўрнига бутун меваларни истеъмол қилиш ҳам фойдали. Уларнинг истеъмоли систолик қон босимини ва “ёмон” холестерин даражасини пасайтиришга ёрдам беради.
Ёғсиз сут
Олимлар ҳозирча ёғсиз сут ичиш қон босимини пасайтириши мумкин, деб тахмин қилмоқда. Буни тасдиқлаш ва аниқ механизмини аниқлаш учун қўшимча тадқиқотлар керак.
Изоҳ (0)