Тармоқда аллақачон машҳур бўлиб улгурган Labubu ўйинчоқлари ўзининг тишли ҳайвончаларни эслатувчи ғайриоддий кўриниши билан ажралиб туради. Уларнинг асосий хусусияти — blind box эканлиги, яъни харидор қутини очмагунча қайси фигурача чиқишини билмаслигидадир. Ўйинчоқ нархлари ҳам арзон эмас: бир дона Labubu тахминан 65 доллар, blind box қутиси эса 120 доллар туради.
Бундай муваффақиятдан сўнг, Labubu ишлаб чиқарувчи PopMart компанияси асосчиси Ван Нин Хитойнинг энг бой одамларидан бирига ва мамлакатдаги энг ёш миллиардерга айланди. У атиги 38 ёшда ва унинг бойлиги 22,7 миллиард долларга етди.
Labubu қаҳрамони илк бор 2015 йилда “Махлуқлар” номли график романда пайдо бўлган. Аммо бу ўйинчоқлар таниқли инсонлар томонидан ижтимоий тармоқларда кўз-кўз қилинганидан кейингина оммалашди.
Бундай ўйинчоқларнинг оддий версияси 10–30 доллар атрофида туради, аммо сиз ноёб Labubuни топиб олсангиз, унинг нархи бир неча баробарга ошади. Кўплаб коллексионерлар ва трендларга амал қилувчилар бундай қутиларни улгуржи тарзда харид қилишади ва камёб моделлар ортидан қувади. Қуйида ҳар қандай Labubu мухлиси орзу қиладиган 5 та энг ноёб ва қимматбаҳо ўйинчоқларни кўриб чиқамиз.
1. Best of Luck
Бу ўзига хос Labubu 2023 йил 30 декабрда атиги 3000 дона чекланган нусхада ишлаб чиқарилган. Унинг дастлабки нархи 85 доллар бўлган. Бугунги кунда бу фигурчанинг нархи олиб сотарлар қўлида 1500–2000 долларга етган.
2. Big Into Energy — ID
Big Into Energy сериясидаги “ID” фигурчаси энг ноёб ва сирли ўйинчоқлардан бири. Оддий версияларидан фарқли равишда, у кулранг бўлиб, ултрабинафша нурларда ялтирайдиган деталлар билан безатилган. Blind box’дан бу фигурчани топиш эҳтимоли 1:144. Нархи эса 1200 долларгача етади.
3.Labubu x Vans
PopMart ва машҳур Vans пойабзал бренди ҳамкорлигида ишлаб чиқарилган мазкур Labubu ҳам чекланган коллекция. У атиги 3 275 дона чиқарилган. Нархи эса 1500–3000 доллар орасида фарқланади.
4. Have a Seat — DUODUO
DUODUO — Have a Seat сериясидаги ўйинчоқлардан бири бўлиб, уни топиш эҳтимоли 1:72. Ўтирган ҳолатдаги бу Labubu ўта камёб ва харидорлар орасида машҳур. Унинг нархи 400–1000 доллар оралиғидадир.
5. Exciting Macarons — Chestnut Cocoa
Exciting Macarons сериясидаги Labubu фигурачаси айнан Chestnut Cocoa ранги билан ноёб ҳисобланади. Унинг blind box’дан чиқиш эҳтимоли 1:72, қўл бозорида эса нархи 1200 долларгача етади.
Изоҳ (0)