Касалланган ва вафот
Хитой Соғлиқни сақлаш миллий комиссияси мамлакатда сўнгги бир сутка ичида 19 киши коронавирус билан касаллангани ҳақида маълум қилди. Вирусни юқтириб олганларнинг 17 нафари Хубэй провинциясидан, Пекин ва Гуандунда ҳам икки киши вирусни юқтириб олган. Охирги бир сутка ичида 17 киши коронавирус оқибатида вафот этган. Уларнинг барчаси — Хубэй аҳолиси.
Эпидемия бошланганидан буён Хитойда 80 754 киши касалликка чалинган бўлиб, уларнинг 3136 нафари вафот этган. 59 897 нафар бемор даволанишга муваффақ бўлган.
Жаҳон соғлиқни сақлаш ташкилотининг маълумотларига кўра, дунё бўйлаб 112 427 киши коронавирус билан касалланган. Даволанишга муваффақ бўлганлар сони эса 63 578 кишини ташкил этмоқда. Хитойдан ташқарида касаллик қурбонлари энг кўп Италия (463), Эрон (237), Жанубий Корея (51), АҚШ (24) ва Францияда (19) қайд этилган.
Ўзбекистондаги вазият
Ижтимоий тармоқларда «Ўртоқлар, бизга, 16-касалхонага иккита коронавирус келди, эҳтиётларингни қилинглар, Тошкентда жуда кўпайиб кетган коронавирус, лекин буни яширишяпти. Икки қават ниқоб тақинглар, кўзларингга кўзойнак тақинглар, чунки коронавирус кўзнинг шиллиқ қаватидан юқади», — деган аудиохабарлар тарқалди. Соғлиқни сақлаш вазирлиги матбуот хизматининг «Дарё»га маълум қилишича, ушбу маълумот ҳақиқатга зид.
Тошкентда 23—25 апрель кунлари бўлиб ўтиши режалаштирилган Tashkent Law Spring II халқаро юридик форуми коронавирус сабабли кейинга қолдирилди. Форум ташкилий қўмитасининг маълум қилишича, бундай қарор форум қатнашчилари, шу жумладан, хорижий меҳмонлар ва Ўзбекистон фуқаролари орасида коронавирус инфекцияси тарқалишининг олдини олиш мақсадида қабул қилинди.
Соғлиқни сақлаш вазири Алишер Шодмонов Ўзбекистонга коронавирус кириб келмагани маълум қилди. Вазирнинг таъкидлашича, агар касаллик мамлакат ҳудудида қайд этиладиган бўлса, унга қарши кураш учун дори воситаларининг захираси, шунингдек, профилактика бўйича имкониятлар етарли.
Россияда коронавирус юқтириб олиш имконини нолга тенг деб баҳолаган эксперт Ўзбекистонда коронавирус тарқалишининг олдини олишга ёрдам беради.
Туркманистон ва Эрон ўртасидаги чегара ёпилиши сабабли қарийб 800 нафар ҳайдовчининг «Лутфобод» ва «Сарахс» чегара назорат-ўтказиш пунктларида қолиб кетганига икки ҳафтадан ошди. Марказий Осиёга Эрон орқали товар олиб борувчи ҳайдовчилар Туркманистон ўз ҳудудига коронавирус кириб келишидан қўрқиб, 23 февраль куни чегараларни ёпиб қўйганидан кейин қолиб кетганди. Чегарада қолиб кетганлар орасида 11 нафар Ўзбекистон фуқароси ҳам бор. Улар Шавкат Мирзиёевга ёрдам сўраб, видеомурожаат йўллаганди. Ўзбекистон ТИВ ҳам бу маълумотни тасдиқлаб, Ўзбекистоннинг Теҳрон шаҳридаги элчихонасининг консуллик бўлими 23 февралдан буён мазкур фуқаролар билан доимий алоқада бўлиб келаётганини маълум қилган.
Жаҳондаги вазият
Сингапурда шифокорлар янги турдаги COVID-19 коронавирус инфекцияси оқибатида юзага келаётган касалликнинг янги белгиларини аниқлади.COVID-19 коронавируси билан касалланганлар сони борган сари кўпайиб бормоқда, бу ҳолат эса Жаҳон соғлиқни сақлаш ташкилоти инфекциянинг дунё миқёсида тарқалиши ҳамда пандемияга айланиши мумкинлигини маълум қилди.
Италия бош вазири Жузеппе Конте коронавируснинг кенг тарқалаши сабаб мамлакатда барча спорт мусобақалари, шу жумладан, футбол бўйича А Серия баҳслари ҳам тўхтатиб қўйилганини маълум қилди.
Энди вақт йўқ. Рақамлар касаллик юқтириб олганлар сони ошиб кетганини кўрсатиб турибди, ўлимлар сони кўпайди. Биз бутун Италия учун бирор нимани қурбонлик қилишга мажбурмиз. Мана нима учун бундай оғир чоралар кўрмоқдамиз. А Серия ва барча спорт мусобақалари вақтинча тўхтатилади. Мухлислар буни қабул қилиши керак.Жузеппе Конте, Италия бош вазири
Италияда барча оммавий тадбирлар бекор қилиниб, фуқароларга уйдан чиқмаслик тавсия этилди. Иш эҳтиёжлари, оилавий ёки соғлиқни сақлаш муаммоларини ҳал қилиш учун истисно бўлиши мумкин. Муниципалитетлар ўртасида ҳаракатланиш учун махсус ҳужжат талаб қилинади.
Шунингдек, Халқаро дзюдо федерацияси (IJF) коронавирус сабаб март ва апрель ойларида ўтказиладиган барча лицензион мусобақаларни бекор қилиш бўйича қарор қабул қилди.
Тожикистонда коронавирус ҳақида миш-миш тарқатиб, халқ орасида ваҳима уйғотганлар қидирилмоқда. Мамлакат Ички ишлар вазирлиги коронавирус ҳақида асоссиз миш-мишларни тарқатганларни топиш ва уларни жавобгарликка тортишга ваъда берди.
Исроил ҳукумати мамлакатга кирувчи барчани карантинга жойлаштириш бўйича қарор қабул қилди. Ҳукумат қарорига кўра, хориждан келаётган Исроил фуқаролари 10 мартдан карантинга жойлаштирилиши керак, қолган мамлакат фуқароларига эса ушбу янгилик 72 соатдан сўнг тааллуқли бўлади.
Хитойнинг Фуцзянь провинциясидаги Цюаньчжоу шаҳрида меҳмонхона қулаши оқибатида ҳалок бўлганлар сони 18 кишига етди, яна 12 киши бедарак йўқолгани айтилмоқда. 7 қаватли меҳмонхона 7 март, шанба куни, қулаган эди. Эртаси куни вайроналар остидан 50 киши чиқариб олинган. Расмий маълумотларга кўра, вайроналар остида 70 киши бор. 80 ўринга мўлжалланган ушбу меҳмонхона 2018 йилда очилган бўлиб, COVID-19 коронавирус инфекцияси эпидемияси сабаб 2020 йилда карантин марказига айлантирилган эди.
Ҳар куни кечқурун фақат битта хабар жўнатамиз. «Дарё» оқшоми — кун давомида рўй берган барча воқеа-ҳодисалар дайжести Telegram-канали: @daryooqshomi
Изоҳ (0)