Исроил ҳаво ҳудудининг вақтинча ёпилгани муносабати билан ушбу мамлакат билан авиақатновлар тўхтатилган. Бу ҳақда Ўзбекистоннинг Исроилдаги элчихонаси хабар берди.
Маълум қилинишича, Исроил ҳукумати ва тегишли авиация идораларидан ҳаво ҳудудининг очилиши тўғрисида расмий хабар келиб тушиши билан Ўзбекистон авиакомпаниялари томонидан кейинги амалиётлар юзасидан алоҳида маълумот тақдим этилади.
Элчихона Ўзбекистон фуқароларини яна бир бор хавфсизлик қоидаларига қатъий риоя қилишга, мамлакатда бўлиш вақтида эҳтиёткорликни оширишга ва ракета отишмалари пайтида бошпаналарни тарк этмасликка чақирмоқда.
Аввалроқ Исроилдаги ўзбекистонликларга заруриятсиз кўнгилочар жойларга бормаслик тавсия қилингани ҳақида хабар берилганди.
13 июнь куни кечқурун Эрон Исроилга баллистик ракеталар билан оммавий ҳужум уюштирди. Тель-Авив ва Қуддусда портлашлар бўлди. Ушбу ҳужум туфайли етказилган зарар ва жабрланганлар ҳақида аллақачон маълумотлар пайдо бўлди.
Эроннинг Исроилга қарши амалга оширган тўрт босқичли ракета ҳужуми оқибатида 3 киши ҳалок бўлди ва камида 70 киши жароҳат олди.
Изоҳ (0)